Viti – Zyra regjionale e OSBE-së në Gjilan, i ka ndarë komunës së Vitisë dhe Kuvendit Komunal certifikatë vlerësimi për progresin e arritur në dy vitet e fundit. Drejtori regjional i OSBE-së Ulrih Biffar, është shprehur i kënaqur me bashkëpunimin e kësaj organizate me të gjithë zyrtarët komunal të Vitisë. Ai ka theksuar se në 2 vitet e fundit është vërejtur një progres në shumë fusha dhe ky përkushtim dhe angazhim institucional është për respekt.
“Ekipi im që vepron në Viti, më raporton mua për aktivitetet dhe punën që bëjnë institucionet në komunën e Vitisë. Gjatë vlerësimit të arritjeve nëpër komuna së bashku me ambasadorin e OSBE-së në Kosovë, kemi parë se në Viti kanë lëvizur gjërat pozitivisht. Për këtë arritje është meritor edhe ky Kuvend, përpos udhëheqësve. Andaj OSBE do të ndajë certifikatën e vlerësimit për kryesuesin e kuvendit Naim Pira dhe kryetarin e komunës Sokol Haliti”, tha Bifar para këshilltarëve të Kuvendit komunal në seancën e sotme.
Ndërsa kryetari i komunës Sokol Haliti, është shprehur se kjo certifikatë ka rëndësi të veçantë. “Unë falënderoj zyrën e OSBE-së në Viti, dhe zyrën regjionale në Gjilan për bashkëpunimin tejet të ngushtë dhe ndihmën që na kanë ofruar. Kjo mirënjohje na nderon shumë, pasi vlerësohen dy nivelet, edhe kuvendi komunal edhe qeveria komunale. Ne do të vazhdojmë punën tonë të përkushtuar në respektimin e ligjeve dhe për përmirësimin e jetës së qytetarëve”, ka thënë Haliti./rajonipress/
