Komisioni s’ka qasje në AKI për faj të Krasniqit

Anëtari i Komisionit për mbikëqyrje të AKI-së, Burim Ramadani, ka akuzuar kryetarin e Kuvendit Jakup Krasniqi, se e ka bllokuar zbatimin e mandatit të plotë të këtij komisioni ndaj agjencisë së vetme zyrtare të inteligjencës në Kosovë. Ramadani, gjatë një interviste për “Tribunën”, ka thënë se Krasniqi nuk i ka dhënë leje AKI-së që t’i verifikojë deputetët e komisionit.

“Është e qartë se AKI-ja nuk mund të bëjë verifikim të deputetëve të komisionit pa lejen e kryetarit të Kuvendit. Prandaj ne jemi të bllokuar kur bëhet fjalë për qasjen më të madhe në punën e Agjencisë”, ka thënë Ramadani. Ai ka sqaruar se nuk është në dijeni pse Krasniqi po e bën një veprim të tillë, por ka paralajmëruar mundësinë e ndryshimit të ligjit nëse vazhdon kjo bllokadë.

“Ne mund ta ndryshojmë edhe Ligjin për AKI-në por besoj se tash për tash nuk është e nevojshme. Ndoshta ndryshimet mund të bëhen më vonë dhe të mos ketë fare nevojë për verifikim të deputetëve”, ka sqaruar Ramadani. /Indeksonline/