Hashim Thaçi e Ramush Haradinaj pritet t’i festojnë Krishtlindjet si partnerë qeveritarë.
Prijësit e dyja partive të dala nga Ushtria Çlirimtare e Kosovës planifikojnë ta qyrtarizojnë koalicionin PDK-AAK, para 24 dhjetorit.
Burime brenda PDK-së kanë bërë të ditur se Haradinaj është pajtuar që të punojë me direktivat e Thaçit si zëvendëskryeministër.
“Hashim Thaçi do të vazhdojë të jetë kryeministër , Haradinaj zëvendës i tij, ndërkohë që AAK-ja pritet t’i marrë tri ose pesë ministri”, ka thënë për “Kohën Ditore” një zyrtar i lartë, i cili është në rrjedha të bisedimeve që janë zhvilluar mes Thaçit e Haradinajt.
Jo zyrtarisht të njejtën gjë e kanë pohuar edhe zyrtarë të AAK-së.
“AAK-ja, pos postit të zëvendëskryeministrit, do t’i marrë edhe tri ministri dhe drejtimin e Kuvendit. Por nëse Thaçi nuk dëshiron ta largojë Jakup Krasniqin nga pozita e kryetarit të Kuvendit, ne i kërkojmë si kompensim edhe dy ministri të tjera. Pra gjithsej pesë ministri”, ka thënë zyrtari i AAK-së.
Të vetmen ministri që PDK-ja insiston me çdo kusht ta mbajë për vete, është ajo e Punëve të Brendshme.
Nga koalicioni qeverisës nuk pritet të ikë Koalicioni për Kosovë të re, ndërkohë që zëvendëskryeminister pritet të mbetet vetëm Behgjet Pacolli ndërkohë që Hajredin Kuçi e Mimoza –Kusari Lila, nëse mbesin në kabinetin e ri pas ndarjes së resorëve me AAK-në, do të ngarkohen vetëm me punë ministrore./Indeksonline/
