Kjo është përgjigja e Presidentës Jahjaga për AAK’në

Presidentja e Kosovës, Atifete Jahjaga i ka dërguar një përgjigje Aleancës për Ardhmërinë e Kosovës, lidhur me ndalimin e Ramush Haradinajt nga shteti slloven.

Në këtë letër që e kë siguruar Gazeta Express thuhet se Presidenca në përpjekje për të siguruar lirimin dhe lirinë e lëvizjes për Haradinaj, janë shfrytëzuar kanalet dhe burimet diplomatike për ta tejkaluar situatën e palakmueshme të krijuar për shkak të rrethanave të pamundësisë së intervenimit të drejtpërdrejt të Kosovës në institucionet ndërkombëtare të sigurisë.

Express më poshtë sjellë letrën e plotë:

Zyra e Presidentes së Republikës së Kosovës thekson se Presidentja Jahjaga e vlerëson dhe mirëkupton shqetësimin e subjektit politik AAK me rastin e ndalimit në Republikën e Sllovenisë të kryetarit të AAK-së dhe njëherësh deputetit të Kuvendit të Kosovës, zotëri Ramush Haradinaj, mbi bazën e një flet arresti që ka shqetësuar gjithë opinionin në vend.

Bazuar në përgjegjësitë kushtetuese dhe në funksion të përfaqësimit të qytetarëve të Republikës së Kosovës, Presidentja Jahjaga ka bërë hapat e domosdoshëm në ruajtjen dhe mbrojtjen e të drejtave dhe të dinjitetit të shtetasve të Kosovës, në këtë rast të deputetit të Kuvendit të Kosovës, z. Haradinaj, përmes kontakteve të drejtpërdrejta me autoritetet më të larta në Republikën e Sllovenisë.

Në bisedën telefonike me Presidentin Borut Pahor, Presidentja Jahjaga ka kërkuar që të sqarohen të gjitha rrethanat e ndalimit të z. Haradinaj duke i shpjeguar Presidentit se flet arresti i lëshuar vite më parë është politik dhe i pabazë. Njëkohësisht, Presidentja Jahjaga ka kërkuar që autoritetet sllovene ta lirojnë z. Haradinaj dhe t’i mundësojnë atij lirinë e lëvizjes, si një të drejtë themelore njerëzore, ashtu siç i është mundësuar edhe në vizitat e tjera në vendet e BE-së.

Në përpjekje për të siguruar lirimin dhe lirinë e lëvizjes për z. Haradinaj, janë shfrytëzuar kanalet dhe burimet diplomatike për ta tejkaluar situatën e palakmueshme të krijuar për shkak të rrethanave të pamundësisë së intervenimit të drejtpërdrejt të Kosovës në institucionet ndërkombëtare të sigurisë.

Zyra e Presidentes së Republikës së Kosovës thekson se Kosova i ka vënë në funksion të gjithë mekanizmat relevantë në përpjekje të mbrojtjes së kredibilitetit të vendit dhe gjithnjë me qëllim të ruajtjes së marrëdhënieve ndërshtetërore me të gjitha vendet.

Zyra e Presidentes së Republikës së Kosovës rithekson faktin se Republika e Kosovës dhe institucionet e saj, do të përpiqen me përkushtim për t’iu dalë në ndihmë qytetarëve të saj në çdo rast dhe në çdo kohë. Veprimet e institucioneve të Kosovës do të jenë në respektim të të drejtave dhe konventave ndërkombëtare dhe me ligjin ndërkombëtar./Gazeta Experess/.