KFOR-i, i përkushtuar për ambient të qetë

Komandanti i Brigadës 158 Mbështetëse të trupave amerikane në Kosovë, koloneli Jeffrey Liethen, të shtunën ia ka dorëzuar solemnisht komandën, kolonelit Waymon Storey, komandant i Brigadës 218 Mbështetëse, në kuadër të rrotacionit të rregullt të trupave në Dërgaten Shumëkombëshe të Lindjes, të zhvilluar në kampin më të madh të forcave të KFOR-it, Bondstill.

Me këtë rast është thënë se misioni i KFOR-it në Kosovë do të jetë përkushtimi për një ambient të qetë dhe të sigurt për të gjithë.

Komandanti i trupave të KFOR-it në Kosovë, gjeneralmajori Volker Halbauer, ka falënderuar pjesëtarët e trupave amerikane në largim për kontributi e dhënë në këtë mision, ndërsa ka thënë se pret edhe nga pasardhësit e tyre të njëjtin përkushtim.

“Gratë dhe burrat që i shërbyen këtij misioni kanë bërë një punë të madhe dhe meritojnë mirënjohjen time. Dërgata Ushtarake e Lindjes duhet të jetë gjithherë e përgatitur për t’iu përgjigjur sigurisë dhe qetësisë në vend. Dhe padyshim që kjo është një punë, mision shumë i rëndësishëm dhe besoj se ekipi i ri do ta vazhdoj përpara këtë mision”, theksoi gjenerali Halbauer.

Komandanti në largim i Grupit Luftarak Shumëkombësh-Lindje, koloneli Liethen, e ka vlerësuar misionin e trupave të tij si shumë të suksesshëm, ndërsa ka thënë se pasardhësi i tij vjen me një forcë që është e përgatitur shumë mirë për këtë mision.

Edhe komandanti i ri i kësaj force, koloneli Storey, ka thënë se forca e tij është e përgatitur mirë për këtë mision, raporton Express.
“Kjo forcë është e përgatitur mirë, është edukuar dhe ka pajisjet e duhura. Vijmë këtu me energji të lartë për të bërë gjëra të mrekullueshme, për të vendosur dhe ndërtuar relacione të mira pozitive me të gjithë”, ka thënë kolonel Storey.

Komandanti i KFOR-it, gjenerali Halbauer, duke u përgjigjur pyetjeve të gazetarëve, ka thënë se misioni i tij përbëhet prej shumë detyrave, ndërsa ka shpjeguar se nuk sheh mundësinë e rritjes së numrit të trupave të tij, e as të FSK-së për një kohë të caktuar.

“Ajo që do të kemi do të jetë ndërrimi i trupave gjatë javëve të ardhshme. Ne do t’i zëvendësojmë batalionet ekzistuese, ato italiane, me një batalion gjermano-austriak dhe ai do të jetë i vendosur në Kosovë deri në fund të vitit”, ka theksuar Halbauer.

Barrikadën e vendosur në urën e lumit Ibër, edhe përkundër pengesave në lëvizjen e lirë, komandanti Halbauer e sheh si një shenjë politike.
“Unë doja të shihja vullnetin politik të autoriteteve politike që të marrin vendimin e duhur për pjesën e veriut. KFOR-i është i gatshëm për t’i shërbyer lirisë së lëvizjes edhe në veri”, ka pohuar komandanti i KFOR-it, Volker Halbauer, për të shtuar se misioni i KFOR-it është që të kontribuoj edhe në zhvillimin e FSK-së.

“FSK-ja do të ketë sukses që të bëhet një forcë e sigurisë dhe të kryejë shërbimet që janë paraparë për të. FSK-ja është në rrugën e duhur për t’u bërë e mjaftueshme për Kosovën dhe KFOR-i do t’i jep mbështetje.

I pyetur lidhur me atë se pse trupat amerikane nuk janë të vendosura në pjesën veriore të Kosovës, gjë që është edhe kërkesë e popullatës lokale, komandanti i Dërgatës Luftarake Shumëkombëshe-Lindje, koloneli Storey, ka thënë se ai dhe trupa e tij janë nën komandën e KFOR-it dhe çfarëdo lëvizje e trupave të tij do të bëhet sipas kërkesës së komandës së KFOR-it.