KFOR-i edhe 7 vjet në Kosovë

Prania ushtarake në Kosovë do të zgjasë së paku edhe pesë deri shtatë vjet, ndoshta edhe më gjatë, ka thënë zëvendëskomandanti i deritashëm i KFOR-it, gjeneral brigade austriaku Johan Luif, i cili ka shtuar se veriu i Kosovës vazhdon të jetë “fuçi baroti”.

Gjenerali Luif i ka deklaruar gazetës “Kurir” të Vjenës, se shkalla e papunësisë në Kosovë është 60 për qind, se nuk ka ekonomi të zhvilluar, dhe se për shkak të “kufijve kontestues me Serbinë veriu i Kosovës mbetet edhe më tutje fuçi baroti” .

Sipas tij, gjatë dymbëdhjetë muajve të fundit në konfliktet me demonstruesit në veri të Kosovës, janë lënduar rreth 100 ushtarë të KFOR-it.