Këshilli i Mediave të Shkruara të Kosovës vendos për 21 ankesa

Të martën Këshilli i Mediave të Shkruara të Kosovës mbajti mbledhjen e tij, në të cilën vendosi për 21 ankesa. KMShK nuk miratoi ankesën e Sali Kqikut kundër portalit Rajoni Press lidhur me artikullin “Sali Kqiku akuzohet për keqpërdorim të pozitës, asgjësoi dhe fshehu materialet arkivore”.

Bordi i KMShK-së miratoi pjesërisht ankesën e ASHINA-s kundër portalit Indeksonline lidhur me artikullin “Pas 10 viteve KFOR-i kthehet në aeroportin e Kosovës”.

Nuk u miratua as ankesa e Bislim Muçajt kundër gazetës Zëri lidhur me artikullin “Petrol – Koksi, rruga e naftës kancerogjene, drejt Kosovës”.

Ankesa e Andin Lokajt kundër portalit Infokusi lidhur me artikullin “Fisnik Ismaili zbulon kush e kishte rrahur Arbana Xharrën” miratohet.

KMShK nuk miratoi ankesën e Agron Selimajt kundër gazetave online Insajderi dhe Telegrafi lidhur me artikullin “Hetime në AKI – dyshime për korrupsion, shantazh, përgjime të paligjshme, ushtrim ndikimi”.

Në këtë mbledhje u miratuan edhe dy ankesat e Hajrulla Çekut kundër portalit Gazeta Monitor lidhur me dy artikujt “Mashtruesi i OJQ-ve Kosovare, zëvendësministër i Ramës”, si dhe “Zv ministri i Edi Ramës, Hajrulla Çeku që tentoi të destabilizonte Kosovën përmes një puqi”.

KMShK gjithashtu miratoi ankesat e Devolli Group kundër gazetës Kosova Sot.
KMShK në këtë mbledhje pranoi portalin Radio Kontakt Plus si anëtar të Bordit të KMShK-së./rajonipress/