Kelmendi në Pejë

Udhëheqësi i njërës prej familjeve më të mëdha mafioze në Ballkan, Naser Kelmendi dyshohet se po fshihet në Kosovë. Burime të Gazetës Express thonë se ditën e mërkurë ai është parë në qytetin e Pejës. Kelmendi është në listën e zezë të Presidentit Obama dhe ka muaj që po kërkohet nga policia boshnjake dhe ajo malazeze.

Një prej njerëzve që dyshohet të jetë bosi i tregtisë së drogës në Ballkan dhe në Europë, Naser Kelmendi është parë ditën e mërkurë në qytetin e Pejës, në perëndim të Kosovës.

Antidroga e SHBA’së, policia boshnjake dhe ajo malazeze iu kanë vënë pas atij, por deri më tash nuk kanë arritur ta kapin.

Gazeta Express, përmes burimeve të saj nga një agjenci ndërkombëtare e inteligjencës që vepron në Kosovë, ka kuptuar se Naser Kelmendi ndodhet në Pejë, qytetin prej nga e ka prejardhjen.

“Ne jemi në kontakt me autoritetet kosovare dhe po përpiqemi ta neutralizojmë atë”, ka thënë zyrtari i inteligjencës që foli në kushte anonimiteti për Express, të enjten.

Burime të Express kanë treguar se në Kosovë nuk ka fletë-arrest për të shumëkërkuarin Kelmendi dhe se autoritetet policore po përpiqen ta rregullojnë bazën ligjore për kapjen e tij.

Policia e Bosnjës ka nisur mëngjesin e së martës një aksion për të arrestuar dhjetëra persona që merreshin me krim të organizuar. Aksioni, i koduar me emrin “Lutka”, ka rezultuar me prangosjen e rreth 25 personave, të cilët janë arrestuar në bazë të kërkesës së prokurorisë.