Kelmendi: Ditë e madhe për sportin e Kosovës

Majlinda Kelmendi e ka vlerësuar si historike pranimin e Komitetit Olimpik të Kosovës në Komitetin Olimpik Ndërkombëtar me drejta të plot.

Pranimi i Komitetit Olimpik të Kosovës (KOK) në Komitetin Olimpik Ndërkombëtar (IOC) e ka gëzuar shumë kampionen e Botës në xhudo, Mjalinda Kelmendin. Kjo e fundit thotë se kjo është një dite e madhe për sportin e Kosovës.

“Një ditë e madhe, historike për sportin e Kosovës dhe Kosovën si shtet, unë kisha shumë emocione gjatë shpalljes së vendimit, dhe isha në stërvitje sa që erdha me vrap ta shoh”, deklaroi Kelmendi për KTV.

“Është një ditë të cilën sportistët e kanë pritur për një kohë të gjatë, e sidomos unë që jam diskriminuar dhe tani do të jemi të barabartë me të tjerët në çdo eveniment sportiv. Sigurisht që ky është një motiv shtesë, më gëzon fakti se në Rio do ta përfaqësoj Kosovën ku do të jemi një grup i sportistëve të Kosovës dhe shpresoj shumë se do të kemi sukses”, u shpreh ajo.