KBI shtron iftar dedikuar familjeve me jetimë

Gjilan – Këshilli i Bashkësisë Islame në Gjilan, organizoi sonte një iftar në restorant “Astoria”, dedikuar familjeve me jetimë nga komuna e Gjilanit.

Në këtë iftar morën pjesë edhe mysafirë nga fondacioni Barakah Charity, si dhe një bashkatdhetar nga Zvicra, i cili kontribuoi me ndihmë materiale për secilën familje pjesëmarrëse.

Të pranishmit i përshëndeti kryetari i Këshillit të Bashkësisë Islame në Gjilan, Naim ef. Aliu, i cili në fjalën e tij theksoi rëndësinë e muajit të shenjtë të Ramazanit, vlerat e solidaritetit dhe bamirësisë, si dhe rëndësinë e ditëve të fundit të agjërimit në përgatitje për festën e Fitër-Bajramit.

Në përfundim të këtij organizimi humanitar, çdo familje përfituese mori nga një ndihmë materiale, si dhe nga një pako ushqimore nga “Sofra e Ramazanit”, me qëllim që të lehtësohet përgatitja për festën e Fitër-Bajramit.

Ky aktivitet është një dëshmi e përkushtimit të vazhdueshëm të Bashkësisë Islame dhe organizatave bamirëse për të qëndruar pranë familjeve në nevojë, veçanërisht gjatë muajit të shenjtë të Ramazanit./rajonipress/