Kastrati: Pak raste të shkeljeve të të drejtave të njeriut në Kamenicë?

Kamenicë – Sipas Nazmije Demolli Kastratit gjatë këtij viti në zyrën e saj ka pasur pak raste të lajmëruara për shkelje të të drejtave të njeriut në Kamenicë

Me rastin e 10 dhjetorit Ditës Ndërkombëtare e të Drejtave të Njeriut, koordinatorja e NJKDNJ, Nazmije Demolli-Kastrati, ka përgatitë një fletëpalosje lidhur me Deklaratën Universale për të Drejtat e Njeriut dhe rëndësisë së 10 dhjetorit të cilën e ka shpërnda në shkolla, qytetarëve dhe institucioneve të ndryshme në nivel komunal.

Sipas Kastratit gjatë këtij viti në zyrën e saj ka pasur pak raste të lajmëruara për shkelje të të drejtave të njeriut në Kamenicë.”Kështu që mund të themi se realizimi i të drejtave të njeriut në komunën e Kamenicës është në nivelin e kënaqshëm, përderisa nuk ka ankesa nga qytetarët. Mirëpo, ndoshta qytetarët hezitojnë të paraqesin ankesat e tyre ”u shpreh Nazmija.

Të drejtat e njeriut, janë bazat për ndërtim të lirisë, paqes dhe drejtësisë, duke shtuar se mbrojtësit e të drejtave të njeriut luajnë rol esencial në mbrojtjen nga diskriminimi dhe ruajtja dhe respektimi i parimit universal të barazisë.

Koordinatorja Kastrati, në mesazhin e saj përkujton nevojën për promovim të vazhdueshëm të të drejtave të njeriut në vend.

Ajo apelon te qytetarët, institucionet, OJQ-të, etj që së bashku të punojnë dhe kontribuojnë, jo vetëm në ditën e përvjetorit të Ditës Ndërkombëtare të të Drejtave të njeriut, por çdo ditë dhe në çdo kohë, me qëllim që të Drejtat e Njeriut të respektohen dhe mbrohen sa më shumë që është e mundur.

Ajo thotë se vazhdimisht t’i kushtojmë rëndësi të veçantë realizimit praktik të drejtave të njeriut të garantuara edhe me Kushtetutën e Kosovës.

Kastrati njëkohësisht i fton qytetarët që në rast se kanë shkelje të të drejtave të Njeriut të paraqiten në Zyrën e NJKDNJ-së në Kamenicë./rajonipress/