Kastrati: I njëjti avaz po vazhdon me këtë qeverisje. Asnjë zgjidhje, vetëm bllokim

Kamenicë – Dhe ndonëse kanë kaluar dy vite që kur Ministria e Arsimit zotohet në vazhdimësi që do të marrë përsipër reformën nga niveli nacional – vetëm sa për të akomoduar mentalitetin konservativ të disa nxitësve të banorëve – dembelia e ministrisë nuk ka dhënë asnjë rezultat deri më tani. I njëjti avaz po vazhdon me këtë qeverisje. Asnjë zgjidhje, vetëm bllokim ka shkruar Qëndron Kastrati.

Postimi i plotë i Qëndron Kastratit

Në kuadër të diskutimeve të njëpasnjëshme me Ministrinë e Arsimit, ndonëse shpeshherë të paargumentuara, ne në vazhdimësi kemi treguar gatishmëri për të përshtatur reformën me kërkesat e tyre. Është e domosdoshme dhe urgjente ndërhyrja në arsim në mënyrë që nxënësve t’u ofrohet arsim më kualitativ. Unë e kam obligim moral e ligjor që të bëj çdo gjë që është në kompetencat e mia për ta avancuar kualitetin e arsimit në Kamenicë.

Dhe ndonëse kanë kaluar dy vite që kur Ministria e Arsimit zotohet në vazhdimësi që do të marrë përsipër reformën nga niveli nacional – vetëm sa për të akomoduar mentalitetin konservativ të disa nxitësve të banorëve – dembelia e ministrisë nuk ka dhënë asnjë rezultat deri më tani. I njëjti avaz po vazhdon me këtë qeverisje. Asnjë zgjidhje, vetëm bllokim.

Ndonëse e kemi shprehur vet se jemi të interesuar të organizuar mësimin alternativ të përshpejtuar për nxënësit që nuk e kanë vijuar atë, Ministria njëanshëm vendosë për një çështje që është kompetencë e nivelit lokal dhe e drejtë dhe përgjegjësi ekskluzive.

Duke e pasur parasysh qëllimin që nxënësit që nuk e kanë vijuar mësimin e rregullt në asnjë mënyrë të mos dëmtohen, Komuna e Kamenicës merr përsipër zbatimin e vendimit të lartcekur.

Po ashtu për hirë të korrektësisë duam të theksojmë se reforma në arsimin paraunivesitar në Komunën e Kamenicës është duke u udhëhequr në përputhje të plotë me konventat ndërkombëtare, Kushtetutën e Kosovës, ligjet në fuqi, dhe me qëllim të rritjes së cilësisë në arsim. Një reformë e tillë për riorganizimin e institucioneve parauniversitare e cila është e domosdoshme në shumë komuna të Kosovës e veçanërisht në Komunën e Kamenicës, do të duhej të gëzonte mbështetjen e MAShTI-it dhe institucioneve qendrore pasi që ka për qëllim të vetëm rritjen e cilësisë në arsim dhe shpenzimin më efikas të fondeve publike.

Duke marrë për bazë këtë që u tha më lartë, në mbështetje të plotë me kompetencat e komunave të përcaktuara nga ligjet e Kosovës, Komuna shpreh gatishmëri për zbatimin e vendimit të ministrisë.

Andaj Komuna në rast të marrjes së mbështetjes financiare për zbatimin e këtij vendimi nga ana e Ministrisë, do të ndërmarrë të gjithë hapat e nevojshëm për të mbajtur orë plotësuese për nxënësit e lartcekur në këto shkolla:
• Për nxënësit e fshatit Busavatë – Procesi i orëve plotësuese do të organizohet në Shkollën Fan S. Noli në Kamenicë;
• Për nxënësit e fshatit Karaçevë e Poshtme – Procesi i orëve plotësuese do të organizohet në organizohet në Shkollën Avni Rrustemi në Karaçevë të Epërme
• Për nxënësit e fshatit Petrit – Procesi i orëve plotësuese do të organizohet në Shkollën Rexhep Mala në fshatin Topanicë
• Për nxënësit e fshatit Shipashnicë e Poshtme – Procesi i orëve plotësuese do të organizohet në Shkollën Sadri Misini në Shipashnicë të Epërme, dhe
• Për nxënësit e fshatit Kopernicë – Procesi i orëve plotësuese do të organizohet në Shkollën Skendërbeu në Hogosht./rajonipress/