Kamenicë: Kuvendi Komunal zhvillon dëgjimin e fundit publik për Draft-Buxhetin 2027

Kamenicë – Kuvendi Komunal i Kamenicës ka mbajtur dëgjimin buxhetor për prezantimin dhe diskutimin e Draft-Buxhetit të Komunës për vitin 2027, si dhe parashikimet buxhetore për periudhën 2027–2029.

Dëgjimin e hapi Kryesuesja e Kuvendit Komunal, Arbnore Beqiraj-Fera, ndërsa në takim morën pjesë Drejtoresha e Financave dhe Buxhetit, Arditë Dërmaku, Drejtori i Investimeve Kapitale, Blerim Morina, zyrtari Selami Zylfiu, zyrtarë të tjerë komunalë dhe qytetarë.

Beqiraj-Fera theksoi rëndësinë e këtij procesi, duke bërë të ditur se bëhet fjalë për dëgjimin e fundit publik para shqyrtimit dhe miratimit të Draft-Buxhetit në Kuvendin Komunal.

“Ky dëgjim buxhetor është një nga hapat e fundit para shqyrtimit dhe miratimit të Draft-Buxhetit për vitin 2027 në Kuvendin Komunal. Përmes këtyre dëgjimeve kemi synuar që qytetarët të kenë mundësinë të shprehin kërkesat dhe prioritetet e tyre, të cilat duhet të jenë pjesë e planifikimit dhe zhvillimit të Komunës sonë. Falënderoj të gjithë qytetarët që kanë marrë pjesë dhe kanë kontribuar me propozimet e tyre gjatë këtij procesi”, ka thënë ajo.

Më pas, Drejtoresha e Financave dhe Buxhetit, Arditë Dërmaku, prezantoi në pika të shkurtra Draft-Buxhetin për vitin 2027.

Sipas Dërmakut, hartimi i buxhetit është zhvilluar përmes disa fazave të konsultimit publik dhe dëgjimeve me qytetarë.

“Ne fillimisht kemi pranuar dy qarkore buxhetore nga Ministria e Financave. Më pas kemi mbajtur dëgjimet buxhetore, 24 dëgjime gjithsej, pothuajse në të gjitha lokalitetet. Në këto dëgjime kemi pranuar kërkesat e qytetarëve, të cilat jemi munduar t’i inkorporojmë në buxhetin për vitin 2027. Buxheti për vitin 2027 do të jetë 15 milionë e 329 mijë e 208 euro”, ka deklaruar Dërmaku.

Pas prezantimit të Draft-Buxhetit, qytetarëve dhe të pranishmëve iu dha mundësia të parashtronin pyetje, sugjerime dhe kërkesa lidhur me planifikimet buxhetore për vitin e ardhshëm.

Meqë nuk pati pyetje, propozime apo diskutime të tjera nga të pranishmit, dëgjimi buxhetor u përmbyll. Draft-Buxheti pritet të procedohet për shqyrtim dhe miratim në Kuvendin Komunal të Kamenicës./rajonipress/