Kamenica siguron inventar arsimor në vlerë prej 132 mijë eurosh për pesë institucione shkollore

Kamenicë – Komuna e Kamenicës ka siguruar inventar në vlerë prej 132.197 eurosh për pesë institucione arsimore, me qëllim të përmirësimit të kushteve për zhvillimin e procesit edukativo-arsimor.

Kryetari i Komunës së Kamenicës, Kadri Rahimaj, ka nënshkruar Memorandum Mirëkuptimi me Ministrinë e Arsimit dhe Shkencës (MASH), përmes të cilit mundësohet pranimi i këtij inventari, i cili do të kontribuojë në krijimin e ambienteve më funksionale dhe më të përshtatshme për fëmijët dhe të rinjtë.

Sipas njoftimit të komunës, inventari do të shpërndahet në pesë institucione arsimore:

Institucioni parashkollor në Koretin;

Institucioni parashkollor “Filizat” në Kamenicë;

Shkolla Fillore dhe e Mesme e Ulët (SHFMU) “Sejdi Kryeziu” në Roganë;

Institucioni i Arsimit dhe Aftësimit Profesional (IAAP) “Andrea Durrsaku” në Kamenicë;

Gjimnazi “Ismail Qemali” në Kamenicë.

Ky investim synon të përmirësojë kushtet fizike në institucionet përfituese, duke krijuar hapësira më të përshtatshme për mësimnxënie dhe duke mbështetur punën e mësimdhënësve në realizimin e aktiviteteve edukative dhe mësimore.

Përfshirja e institucioneve parashkollore, shkollave fillore dhe të mesme në këtë mbështetje synon të ndikojë në përmirësimin e kushteve arsimore në nivele të ndryshme të sistemit të edukimit.

Komuna e Kamenicës ka bërë të ditur se do të vazhdojë angazhimin për avancimin e infrastrukturës arsimore dhe krijimin e kushteve më cilësore për fëmijët dhe nxënësit, duke e konsideruar investimin në arsim si një nga faktorët e rëndësishëm për zhvillimin e qëndrueshëm të komunitetit./rajonipress/