Kamenica nis vitin 2026 me investim madhor në shëndetësi: QKMF-ja do të ndërtohet me objekt të ri

Kamenicë – Komuna e Kamenicës e ka nisur vitin 2026 me një lajm të rëndësishëm për sektorin e shëndetësisë. Sot është nënshkruar marrëveshja për ndërtimin e objektit të ri të Qendrës Kryesore të Mjekësisë Familjare (QKMF) në Kamenicë, projekt ky me vlerë prej afër 1 milion euro.

Marrëveshja është rezultat i bashkëpunimit të vazhdueshëm me z. Usame Morina, ndërsa investimi synon përmirësimin e infrastrukturës shëndetësore dhe rritjen e cilësisë së shërbimeve shëndetësore primare për qytetarët e Komunës së Kamenicës.

Ky objekt i ri pritet të krijojë kushte më moderne për stafin mjekësor dhe pacientët, duke garantuar shërbime më efikase dhe më cilësore në kujdesin parësor shëndetësor.

Nga Komuna e Kamenicës është shprehur mirënjohje e veçantë për donatorin “Dar Al Beer Society”, si dhe për z. Usame Morina, për kontributin e dhënë deri më tani në mbështetje të projekteve me rëndësi jetike për komunitetin.

Shëndetësia mbetet një nga prioritetet kryesore institucionale, ndërsa autoritetet komunale kanë bërë të ditur se edhe në vazhdim do të realizohen projekte të tjera në funksion të përmirësimit të shërbimeve publike./rajonipress/