Kamenica intensifikon përgatitjet për Zonën Ekonomike, Rahimaj takon ministren Mimoza Kusari-Lila

Kamenicë – Kryetari i Komunës së Kamenicës, Kadri Rahimaj, ka zhvilluar një takim pune me ministren Mimoza Kusari-Lila, ku, së bashku me drejtorin Edon Dermaku dhe deputetin Ilir Kërqeli, kanë diskutuar për mundësitë e bashkëpunimit institucional, me fokus të veçantë në themelimin e Zonës Ekonomike në Kamenicë.

Gjatë takimit u theksua se krijimi i Zonës Ekonomike paraqet një projekt me rëndësi strategjike për zhvillimin afatgjatë të komunës, pasi synon të krijojë kushte më të favorshme për zhvillimin e ekonomisë lokale, tërheqjen e investitorëve potencialë dhe hapjen e vendeve të reja të punës.

Kryetari Rahimaj bëri të ditur se Komuna e Kamenicës do të vazhdojë angazhimin e saj në përmbushjen e të gjitha procedurave të nevojshme, përfshirë përgatitjen e dokumentacionit, miratimin e vendimeve dhe realizimin e studimeve përkatëse, me qëllim që procesi i themelimit të Zonës Ekonomike të ecë përpara sipas planifikimeve.

Nga ana e saj, ministrja Mimoza Kusari-Lila shprehu gatishmërinë për bashkëpunim dhe mbështetje institucionale për këtë projekt, duke e cilësuar atë si një nismë me rëndësi për zhvillimin ekonomik të Kamenicës dhe për krijimin e një klime më të favorshme për investime.

Themelimi i Zonës Ekonomike konsiderohet një ndër projektet kryesore zhvillimore të Komunës së Kamenicës, i cili pritet të ndikojë në fuqizimin e sektorit privat, rritjen e konkurrueshmërisë ekonomike dhe krijimin e perspektivave të reja për investime vendore dhe të huaja./rajonipress/