Kamberi: Jemi kundër taksave të polisave dhe dënimeve

Kryetari i Partisë për Veprim Demokratik dega në Bujanoc, Shaip Kamberi, është shprehur kundër taksave të polisave të cilat duhet t’i nënshtrohen shqiptarët e Luginës me rastin e hyrjen me makina në territorin e Kosovës.

Kamberi tha se me këto taksa po pengohet qarkullimi i lirë i shqiptarëve të kësaj ane.

“Jemi kundër vendosjes se taksave për polisat e sigurimit, sepse konsiderojmë se kjo taksë pengon qarkullimin e lirë të shqiptarëve të Luginës”, ka deklaruar sot për Titullin, Kamberi.

Ai njëherit është shprehur edhe kundër shqiptimit të gjobave ndaj ngasësve të Luginës të cilët në disa raste nuk kanë bërë pagesën e sigurimeve.

“Jemi edhe kundër dënimeve që i shqiptohen shqiptarëve në rastet e mospagesës së taksave”, tha ish kryetari i Komunës së Bujanocit.

Për taksat e polisave të sigurimit, ditë më parë reagoi edhe deputeti nga radhët e LDK-së në Kuvendin e Kosovës, Lutfi Haziri, i cili ishte kundër shqiptimit të gjobave ndaj shqiptarëve të Bujanocit, Preshevës dhe Medvegjës.

Ai propozoi refundimin si zgjidhje e cila do të kënaqte ligjin, që do të nënkuptonte me kthimin e të hollave vozitësve të Luginës në dalje nga territori i Kosovës.

Ditë më parë Titulli.com raportoi për urdhëresën që e kishte marrë policia e komunikacionit në Republikën e Kosovës, sipas të cilës do të duhej të gjobiste me 150 euro çdo vozitës me makinë me targa të Luginës, që në territorin e këtij shteti ka hyrë pa paguar taksën e polisave të sigurimit.

Me këtë rast komandantja rajonale e policisë në Gjilan, Elmina Mamuti, ka thënë se “policia e Gjilanit nuk vendos taksa e as nuk dënon shqiptarë të Luginës. Ne thjeshtë vetëm po e zbatojmë ligjin”.

Qytetarët shqiptarë të Luginës së Preshevës të cilët me makinat e tyre hyjnë në Kosovë duhet të paguajnë 20 euro sigurim për një javë qarkullim nëpër rrugët e saj./Titulli.com/