Kadriu: Nuk janë zhvilluar asnjëherë negociata me PDK rreth koalicioneve

Gjilan – Sa i përket çështjes së koalicioneve, Rexhep Kadriu ka hedhur poshtë të gjitha deklaratat e dhëna deri më tani nga Qemajl Mustafa për koalicion me AAK-në, duke thënë se deri më sot, asnjëherë nuk janë zhvilluar bisedime me askënd në këtë drejtim.

Kryetari i AAK-së në Gjilan Rexhep Kadriu, të mërkurën ka mbajtur konferencë për media, ku ka falënderuar të gjithë qytetarët e Gjilanit për votën dhe besimin që ata i kanë dhënë Aleancës në këto zgjedhje.

“Edhe pse pritjet tona kanë qenë më të mëdha, unë i falënderojë të gjithë ata qytetarë që kanë përkrahur dhe mbështetur Aleancën në Gjilan. Unë gjatë gjithë këtyre muajve, kam punuar me vullnetin dhe angazhimin më të madh vetëm e vetëm për t`i ndihmuar qytetarët e Gjilanit. Këtë e kam bërë me buxhetin tim familjar pa ndihmën e askujt tjetër, prandaj ua bëjë hallall krejt mundin dhe premtojë se edhe në të ardhmen do të punojë për t`i dalë në ndihmë qytetarëve”, ka thënë Kadriu.

Sa i përket çështjes së koalicioneve, Kadriu ka hedhur poshtë të gjitha deklaratat e dhëna deri më tani nga Qemajl Mustafa për koalicion me AAK-në, duke thënë se deri më sot, asnjëherë nuk janë zhvilluar bisedime me askënd në këtë drejtim.

“Të gjitha deklaratat për koalicion me AAK-në janë gënjeshtra. Për koalicion, vendosim unë dhe struktura e AAK-së, prandaj ne së shpejti pritet të kemi një takim me kryesinë ku do të shqyrtohen të gjitha çështjet dhe do të merret vendim që do të përkojë padyshim edhe me interesin e qytetarëve, i cili është primar për ne”, ka shtuar më tej Kadriu.

Kadriu, ka falënderuar qytetarët e Gjilanit për kulturën e dëshmuar gjatë ditës së votimit./rajonipress/