Kadriu: I besova LDK-së dhe garova, tani pres votën e çdo gjilanasi

Gjilan – Me entuziazëm, bindje dhe përgjegjësi qytetare, Rexhep Kadriu hyri në garën për deputet duke i besuar Lidhjes Demokratike të Kosovës dhe vizionit të saj për një Kosovë stabile e zhvillimore. Sot, në mbyllje të fushatës, ai u drejtohet të gjithë gjilanasve që duan ndryshim real dhe përfaqësim dinjitoz, duke kërkuar mbështetjen për numrin 52.

Kadriu thekson se vendimi për të garuar nuk ishte i rastësishëm, por i ndërtuar mbi besimin e thellë në LDK dhe në filozofinë politike të Ibrahim Rugovës, si parti e stabilitetit, unitetit dhe orientimit evropian. “I besova LDK-së dhe hyra në këtë garë me bindjen se Gjilani dhe Kosova meritojnë më shumë më shumë punë, më shumë përgjegjësi dhe më shumë rezultate konkrete”, ka deklaruar ai.

Në mesazhin e tij përmbyllës, Rexhep Kadriu ka falënderuar çdo qytetar, çdo gjilanas zemërmirë dhe çdo aktivist shpirtbardhë që e kanë përkrahur gjatë kësaj fushate, duke e mbështetur konceptin e tij për një Gjilan evropian, funksional dhe të zhvilluar.

“I falënderoj nga zemra të gjithë ata që ishin pjesë e këtij rrugëtimi të përbashkët. LDK-ja e Ibrahim Rugovës po rikthehet fuqishëm në skenën politike si parti e stabilitetit dhe e unitetit politik. Gjilanit i kam premtuar punë dhe angazhim të pandalshëm dhe nuk do të pushoj asnjë minutë deri në realizimin e projekteve madhore që i kemi nisur dhe që kanë mbetur përgjysmë. Mjaft kemi humbur, mjaft jemi dëmtuar, ka ardhur koha që LDK-ja dhe unë, përkrah saj, ta zhvillojmë Gjilanin në të gjitha drejtimet”, ka theksuar Kadriu.

Me këtë mesazh, Rexhep Kadriu e përmbyll fushatën me thirrje të qartë për mobilizim qytetar, duke e parë votën si akt besimi, përgjegjësie dhe shprese për të ardhmen e Gjilanit dhe Kosovës./rajonipress/