Kadriu i AAK-së vizitë në Klubin e boksit “Drita”

Gjilan – Kryetari i AAK-së në Gjilan Rexhep Kadriu, nënkryetari i AAK-së në nivel Qendror Ahmet Isufi, bartësi i listës së AAK-së Selami Xhemaili si dhe sekretari i AAK-së Nazim Gagica, të enjten kanë vizituar klubin e boksit “Drita” në Gjilan.

Qëllimi i kësaj vizite ka pasur të bëjë me pjesëmarrjen e klubit në Kampionatin Botëror të Boksit në Kazakistan.

Elhami Bajrami, trajner i klubit e ka falënderuar delegacionin e AAK-së për vizitën, ndërsa ka thënë se e çmojnë pa masë interesimin e tyre për t’i uruar suksese boksierit Liridon Zeqiri, i cili do të na përfaqësojë në këtë kampionat.

Ndërkaq, Kadriu ka thënë se pjesëmarrja e klubit të boksit “Drita” dhe boksierit Liridon Zeqiri në Kampionatin Botëror të Boksit në Kazakistan, është krenari për të gjithë Gjilanin dhe Kosovën. Ai ka shtuar duke thënë se do ta presim Liridonin me medalje.

Ndryshe, Liridon Zeqiri dhe përcjellës të tjerë të klubit, janë nisur sot për në Kazakistan. /rajonipress/