Kadriu: E ardhmja e Gjilanit është në duart e të rinjve

Gjilan – Kryetari i AAK-së në Gjilan njëherit kandidat për kryetar të komunës nga radhët e kësaj partie Rexhep Kadriu, mbrëmjen e së hënës është takuar me një grup të të rinjve, grup ky i cili përkrahë kryetarin Kadriu.

“Kam dashur të jemi bashkë këtu, sepse e ardhmja e Gjilanit është në duart e juaja, e jo në duart e atyre që kanë udhëhequr qe një kohë të gjatë me Gjilanin. E gjithë perspektiva këtu është te fjala juaj më 3 nëntor”, ka thënë Kadriu.

“Po nisemi me kohën e Aleancës, kur unë kam ardhë në krye të saj para 6 muajve. Kam dashur t`i hy kësaj sfide për një arsye, ndryshimin. Ndryshimin e kam nisur nga Aleanca me njerëz të rinj, që kanë eksperiencë dhe përgatitje. Aty e kam parë që ka shumë të rinj me nivel të lartë të studimeve, por pa perspektivë. Ajo çfarë unë kam bërë, i kam hapur dyert e Aleancës dhe kam kërkuar ndihmë nga ta. Një mjek i mirë, një jurist i mirë…është në mesin tuaj, prandaj unë kam nevojë për ndihmën tuaj për të ecë përpara”, ka shtuar ai.

Të rinjtë, kanë shprehur pakënaqësitë e tyre në lidhje me kërkesat e shumta të fushave të ndryshme që ata i kanë adresuar në institucionet komunale, por që asnjëherë nuk kanë marrë përgjigje për ndihmë në atë drejtim.

Ndërkaq, Kadriu ka premtuar se këta të rinj dhe të gjithë të rinjtë e Gjilanit, do ta kenë gjithmonë përkrahjen dhe mbështetjen e tij, sepse siç ka thënë ai, të rinjtë janë ardhmëria e vendit tonë.

Kadriu, në këtë takim me të rinjtë është shoqëruar nga sekretari i përgjithshëm i Degës Nazim Gagica./rajonipress/