Kadri Rahimaj: Biznesi “Tasneem” investon 1.6 milionë euro në Kamenicë, krijohen 12 vende të reja pune

Kamenicë – Kryetari i Komunës së Kamenicës, Kadri Rahimaj, ka bërë të ditur se biznesi “Tasneem” ka vendosur të investojë 1.6 milionë euro në Kamenicë, duke zgjedhur vendlindjen si destinacion për zhvillimin e aktivitetit të tij prodhues, me synim eksportimin e produkteve në Zvicër.

Përmes një postimi publik, Rahimaj theksoi se ky është një tjetër investim i rëndësishëm për komunën, i cili pritet të ndikojë në zhvillimin ekonomik lokal dhe në krijimin e vendeve të reja të punës.

Sipas tij, Komuna e Kamenicës dhe kompania kanë arritur një marrëveshje në vlerë prej 74,257.40 euro, e cila parasheh rregullimin e infrastrukturës së nevojshme për funksionalizimin e këtij investimi.

Kryetari Rahimaj bëri të ditur se në kuadër të këtij projekti pritet të punësohen 12 persona, ndërsa produktet e biznesit do të eksportohen në tregun zviceran, duke e shndërruar investimin në një shembull të bashkëpunimit ndërmjet institucioneve lokale dhe sektorit privat.

Ai vlerësoi se investime të tilla janë dëshmi se Kamenica po krijon kushte gjithnjë e më të favorshme për bizneset dhe investitorët, duke nxitur zhvillimin ekonomik dhe hapjen e vendeve të reja të punës për qytetarët./rajonipress/