Gjilan- Dezinsektimi është realizuar në katër faza, në periudhë kohore rreth 21 ditë nga njëra-tjetra duke filluar nga muajit mars dhe ka përfunduar me 30 korrik tha Xhemajl Salihu.
Me qëllim të ruajtjes së shëndetit publik dhe krijimit të një jete më të rehatshme të qytetarëve të Komunës së Gjilanit, edhe këtë vit është kryer dezinsektimi në komunën tonë, i cili është realizuar në tri faza të parapara, e që me kërkesën tonë si komision, por edhe me vullnetin e kompanisë, është realizuar edhe faza e katërt e dezinsektimit. Këtë punë e ka bërë kompania N.SH. “FAUNA”, nga Gjilani tha Xhemajl Salihu.
Salihu, tha se në bazë të projektit të paraparë nga Kuvendi Komunal, nga Drejtoria e Shëndetësisë dhe me vendim të Kryetarit të Komunës, sipërfaqja e paraparë e dezinsektimit ka qenë 1000 hektarë, e që mendojmë se ky projekt është realizuar në tërësi, ndoshta edhe më tepër.
“Si zakonisht, dezinsektimi është bërë në vendet me më shumë insekte në qytet, por në përgjithësi, është reaguar thuajse në tërë sipërfaqen brenda qytetit, ku mendojmë se të gjitha fazat janë trajtuar si duhet dhe me sukses. Për këtë konstatim ne bazohemi në reagimet e qytetarëve të cilët zakonisht e mirëpresin dhe e vlerësojnë si efekt pozitiv, për çka edhe janë falënderues, për punën që është bërë” tha drejtori Salihu.
“Dezinsektimi është realizuar në katër faza, në periudhë kohore rreth 21 ditë nga njëra-tjetra duke filluar nga muajit mars dhe ka përfunduar me 30 korrik. Ndërkaq dezinfektimi i objekteve komunale – shkollore, është paraparë të filloj në fund të muajit gusht dhe të përfundoj në fillim të muajit shtator”tha Salihu./rajonipress/
