Ka ndërruar jetë Nexhati Rexhepi nga Presheva, bibliotekisti dhe aktori që la gjurmë në jetën kulturore

Gjilan – Nexhati Rexhepi, i njohur për kontributin e tij në arsim, bibliotekari, teatër dhe recitim, ka ndërruar jetë më 20 tetor 2026, në Preshevë. Ai punoi për shumë vite si bibliotekist në Bibliotekën e Qytetit të Preshevës, ku edhe u pensionua. Me rastin e ndarjes së tij nga jeta, Ferid Selimi profesor universitar ka rikthyer një shënim nga ditari i tij, përmes të cilit kujton figurën, veprimtarinë dhe kujtimet personale për të ndjerin.

Ferid Selimi: Ky ishte Gjergji im – Nexhati Rexhepi
Një shënim nga këndi im, nxjerrë nga ditari i jetës, i shkruar para disa vitesh dhe i modifikuar për sot.

Ky ishte Gjergji im…

Nexhati (Emrullah) Rexhepi – mësues, bibliotekist dhe aktor.

Këtë shënim në ditarin tim për Nexhati (Emrullah) Rexhepin, nga familja e Rramonëve të Preshevës, i cili jetoi deri më sot, më 20 tetor 2026, në Preshevë, e pata shkruar para disa vitesh dhe e pata titulluar “Ky është Gjergji im”.

Këtë titull e pata vendosur për dy arsye:

E para, në vitin 1968, me trupën teatrale të Preshevës, kishte luajtur rolin e Gjergj Kastriotit – Skënderbeut.

E dyta, në vitin 1978, po ashtu me atë trupë teatrale, pati luajtur rolin e Gjergjit në dramën “Agu” të Din Mehmetit.

I lindur diku kah fundi i viteve të tridhjeta të shekullit njëzet, në një familje të njohur punëtorësh në Preshevë, i ra hise të ishte ndër të parët e arsimuar për kohën që ishte.

Si i arsimuar që ishte, një kohë punoi mësues nëpër disa fshatra të Preshevës e të Gjilanit, e më pas bibliotekist në Bibliotekën e Qytetit në Preshevë.

E deshi librin dhe arsimin.

E deshi dhe jetoi për artin e të lexuarit, për artin e aktrimit dhe për artin e të recituarit. Luajti në shumë shfaqje teatrale dhe ishte pjesë e shumë recitaleve.

Ushtroi shumë nxënës për recitime dhe i shoqëroi në shumë festivale të recituesve në qytete të ndryshme të ish-Jugosllavisë së atëhershme.

Punoi shumë vite në Bibliotekën e Qytetit dhe ishte udhëzues për çdo nxënës që i drejtohej për ndonjë libër, duke ua përzgjedhur librat më të mirë.

E sot…

Sot, paska mbyllur kapitullin jetësor dhe paska marrë rrugëtimin e amshimit.

Edhe diçka që e karakterizonte Gjergjin tim: kur e takonim dhe e pyesnim për shëndetin, ai, pa u hamendur, duke qeshur e duke u mbajtur për shkopin e drunjtë, na e kthente:

“Më keq se dje, e më mirë se nesër!”

Përgjigje epike e Gjergjit tim, përkatësisht e agës Nexhati, që tashmë la këtë botë…

I lehtë të qoftë dheu i Preshevës, aga Nexhati!

Lamtumirë, Gjergji im!

Zoti të mëshiroftë!

Ferid Selimi