Gjilan – Fahri Qerimi tha se një ndër sfidat është edhe mungesa e kuadrove në lëndën e Gjuhës Angleze dhe në lëndën e Matematikës.
Kryetari i Komunës së Vitisë Nexhmedin Arifi së bashku me Drejtorin për Arsim Fehri Qerimi janë takuar me drejtorët e shkollave të kësaj Komune. Me këtë rast ata kanë diskutuar lidhur me procesin edukativo mësimor, menaxhimin e buxhetit në shkolla nga Drejtorët, Konkursi për përzgjedhjen e kuadrit si dhe detyrat, puna dhe sfidat që do t`i përcjellin ata gjatë punës edukative dhe mësimore.
Gjatë këtij takimi është theksuar se në shumicën e shkollave të Vitisë ka rënie të numrit të nxënësve dhe mësimdhënësve.
Nexhmedin Arifi kryetari i Komunës së Vitisë theksoi se është shumë me rëndësi që drejtorët të bashkëpunojnë ngushtë me mekanizmat institucional me qëllim që procesi edukativo arsimor në këtë komunë të jetë në nivel të kënaqshëm.
Ai shtoi se Komuna e Vitisë i ka dhënë prioritet arsimit pasi që vetëm përmes një shoqërie të arsimuar Vitia mund të zhvillohet në të gjitha segmentet e saj. Ndërsa Drejtori i Arsimit Fehri Qerimi tha se kjo drejtori ka përcaktuar disa objektiva si ngritjen e cilësisë në mësim, ngritjen e kapaciteteve, vijueshmëria, respektimi i orarit të punës dhe atë 5 ditë në javë.
Qerimi kërkoj nga drejtorët që t`i paraqesin shqetësimet dhe problematikën me të cilën përballën ata. “Shkolla është vendi ku fëmijët tanë duhet të arsimohen dhe edukohen , kjo është sfidë , por edhe obligim i juaj andaj ju bëjë thirrje që punën si drejtorë të shkollave ta bëni me përgjithësi të plotë pasi e ardhmja e fëmijëve tanë varët edhe nga puna juaj” u shpreh Qerimi.
Ai tha se një ndër sfidat është mungesa e kuadrove në lëndën e Gjuhës Angleze dhe në lëndën e Matematikës. Ndërsa Drejtorët e Drejtorive paraqitën disa nga pengesat dhe sfidat me të cilën ballafaqohen shkollat si buxheti i vogël, numri në rënie i nxënësve, por edhe mungesa e normave të plota për mësimdhënësit.
Gjatë këtij takimi është biseduar edhe rreth raportit të mësimdhënësve dhe nxënësve sipas udhëzimit administrativ të MASHT-it 19/2009./rajonipress/
