Juventusi synon ta marrë Januzajn, sikur Pogban

Pas transferimit të Paul Pogbas, një vit më parë, të cilin e mori për një shumë mjaft të vogël nga Manchester United, tash Juventusi po mendon që në shpejtësi ta transferojë edhe mesfushorin kosovar Adnan Januzaj, njofton uebfaqja juvenews.eu.

18 vjeçari, i cili kishte zbarkuar tek ‘Djajtë e Kuq’ dy vjet më parë, nuk e ka arritur ende marrëveshjen me klubin nga Old Traffordi për vazhdimin e kontratës.

Kjo është një situatë e ngjashme me atë të përfaqësuesit francez, i cili ishte transferuar në Torino, pasi nuk e kishte gjetur gjuhën e përbashkët me menaxherin e atëhershëm, Sir Alex Ferguson.

Për futbollistin me pasaportë belge interesim ka shprehur edhe Barcelona, por drejtuesit e klubit Bianconeri duan të lëvizin shpejt dhe ta mposhtin konkurrencën e gjigantit katalunas.

Vlera e lojtarit sillet kah një milion euro, por Januzaj konsiderohet si njëri prej talentëve më të mëdhenj të futbollit evropian. Pikërisht për këtë, klubi më i madh italian nuk dëshiron ta lëshojë këtë mundësi të artë./express/