Jeta e Re bën bujë në El Salvador

Për disa ditë numri i ri i revistës Jeta e Re, që shpërndahet ne formë të printuar dhe elektronike, ka qenë ndër ngjarjet më të përfolura në El Salvador, pasi në këtë numër është botuar edhe poeti salvadorian Carlos Ernesto Garcia.

Revista letrare “Jeta e Re”, në numrin 2, të fund tetorit 2012, vendosi të botojë në Kosovë, nën përkthimin në shqip të profesores së universitetit Drita Isufaj, 15 poezi të shkrimtarit salvadorian Carlos Ernesto Garcia.

Në revistën ContraCultura të Salvadorit thuhet se “Jeta e Re” është organi i parë i cili pas Luftës së Dytë Botërore, u bëri të mundur intelektualëve të Ballkanit të nisnin botimin e veprave të tyre në gjuhën shqipe.

Përveç autorëve më të njohur ballkanas, ‘Jeta e Re’ përzgjedh të botojë edhe shkrimtarë ndërkombëtarë të kalibrit të Philip Roth, Umberto Eco, Mo Yan (Çmimi Nobel 2012), Rabindranath Tagora, Susan Sontag, Jack Kerouac , TS Eliot, Salman Rushdie, Woody Allen, Guy de Maupassant, Herta Müller, Rose Auslander, Carlos Fuentes, Albert Camus, Charles Bodler Max Frish, Ichiyo Higuchi, Edgar Allan Poe, Mario Vargas Llosa, Orhan Pamuk, etj.

Revista, e cila në këtë numër përbëhet nga 376 faqe, botohet që nga viti 1949 në qytetin e Prishtinës, dhe ndër të tjera, ka një shpërndarje të gjerë në Shqipëri, Maqedoni dhe Mal të Zi.