Jahjaga nën akuza për demarkacionin

Komisioni ndërkombëtar e thelloi krizën politike. Presidentja në largim fajësohet për shërbimin e keq që i bëri Qeverisë antikushtetuese

Analistë, ekspertë dhe opozitarë drejtojnë kritika të ashpra edhe ndaj kreut të shtetit, për lojën e saj politike në fund të mandatit. Ndërkohë, kryetari i Aleancës për Ardhmërinë e Kosovës, Ramush Haradinaj, ka kërkuar që Byroja Federale e Hetimeve në SHBA (FBI) të hetojë anëtarët e Komisionit Shtetëror të Kufirit, të cilët kanë bërë shënjimin e vijës kufitare të Kosovës me Malin e Zi

Përfaqësues të partive politike opozitare dhe analistë e ekspertë të pavarur janë befasuar nga raporti i publikuar i Komisionit ndërkombëtar për demarkacionin e kufirit me Malin e Zi, duke konstatuar se presidentja në largim, Atifete Jahjaga, këtij vendi dhe qytetarëve u bëri shërbimin më të keq në fund të mandatit, duke i shërbyer vetëm Qeverisë së shantazhuar për pazaret e saja në dëm të shtetit.

Veprimi i saj dhe rezultati final vetëm sa do ta thellojë edhe më tej krizën politike në vend. Kryetari i Aleancës për Ardhmërinë e Kosovës, Ramush Haradinaj, ka kërkuar që Byroja Federale e Hetimeve në SHBA (FBI) të hetojë anëtarët e Komisionit Shtetëror të Kufirit, të cilët kanë bërë shënjimin e vijës kufitare të Kosovës me Malin e Zi. Përmes një postimi në ‘Facebook’, Haradinaj ka bërë të ditur se i ka shkruar letër presidentes në largim të Kosovës, Atifete Jahjaga, e cila ka iniciuar formimin e një komisioni me ekspertë ndërkombëtarë për vlerësimin e demarkacionit. Ekspertët ndërkombë- tarë kanë thënë se nuk kanë gjetur shkelje në marrëveshjen për demarkacionin e kufirit ndërmjet Kosovës dhe Malit të Zi. Por, Haradinaj ka thënë se “i gjithë procesi i shënimit të kufirit me Malin e Zi, përpara se të jetë një çështje juridike ndërkombëtare, është një problem i brendshëm dhe është e domosdoshme që ai t’i nënshtrohet një hetimi të hollësishëm ndërkombëtar”./kosova sot/