Jacobson: Zgjidhja e ngërçit në Kosovë, pa ndërhyrje të jashtme

​Tre muaj kanë kaluar që nga mbajtja e zgjedhjeve në Kosovë. Bashkësia ndërkombëtar, por edhe qytetarët e Kosovës, janë shumë të interesuar që të shohin deputetët duke i çuar përpara proceset.

Këto komente i ka bërë të martën në Mitrovicë, ambasadorja e SHBA-ve në Kosovë, Tracey Ann Jacobson gjatë përurimit të një shkolle fillore në këtë qytet. Jacobson ka përsëritur se nuk i takon bashkësisë ndërkombëtare dhe as Ambasadës amerikane që të ndërhyjë në një proces të brendshëm politik të një vendi.

Sipas saj, kanë kaluar tre muaj nga mbajtja e zgjedhjeve dhe është interesim i madh i bashkësisë ndërkombëtare në përgjithësi, por edhe i qytetarëve, që t’i shohin deputetët duke i çuar proceset përpara dhe në interes të shtetit të Kosovës, dhe të mos angazhohen për politika partiake e të njëanshme. Jacobson ka cilësuar si shumë të rëndësishme po ashtu vazhdimin e dialogut me Serbinë, pastaj integrimin evropian, miratimin e ligjit për luftëtarët në trevat e huaja, etj. për të cilat, siç u shpreh ajo, do të vazhdohet të punohet me institucionet e reja sapo të themelohen.

Me një ceremoni , të martën është përuruar renovimi i tërësishëm i shkollës fillore ‘Musa Hoti’ në Mitrovicë. Kjo shkollë është renovuar falë donacionit në vlerë prej 530 mijë dollarësh nga Komanda Evropiane e Armatës së SHBA-ve (USEUCOM).

Gjatë përurimit ambasadorja Jacobson tha se “Arsimi është e ardhmja e një vendi dhe ambasada amerikane është krenare që mund të bashkëpunojë me juve në këtë drejtim”, ndërsa kryetari i Mitrovicës, Agim Bahtiri, tha se pavarësisht nga koha që kalon dhe ndërrimi i qeverive, qëllimi i shkollave mbetet i njëjtë, edukimi i qëndrueshëm i brezave.

“Kjo është e mijta pjesë e ndihmës amerikane që i është bërë Kosovës”, ka thënë ministri i Arsimit, Ramë Buja, duke shtuar se SHBA-të janë bashkërealizatore e lirisë dhe pavarësisë së Kosovës”. Buja tha po ashtu se krejt këtë që Qeveria mike amerikane po e bënë për Kosovën, populli i Kosovës duhet t’ia kthejë me punë dhe angazhim, e kjo nënkupton edhe mësimin, kur dihet se kjo është ardhmëria e një vendi.