Ja pse ndihemi të lodhur pas ndryshimit të orës

Ndryshimi i orës, edhe pse duket një proces i zakonshëm dhe i padëmshëm, ka një ndikim më të madh në organizmin e njeriut sesa mendohet.

Ekspertët paralajmërojnë se edhe një ndërprerje e shkurtër e ritmit cirkadian, si ajo që vjen nga kalimi në orën verore, mund të sjellë pasoja të dukshme në mirëqenien fizike dhe mendore.

Sipas specialistëve, zhvendosja e orës me vetëm 60 minuta mjafton për të prishur balancat e brendshme të trupit.

Kjo reflektohet kryesisht në cilësinë e gjumit, i cili bëhet më pak i thellë dhe më pak rigjenerues. Si pasojë, gjatë ditës rritet ndjeshëm lodhja, ulet përqendrimi dhe mund të shfaqen edhe luhatje të përkohshme në metabolizëm.

Ekspertja e mjekësisë së brendshme dhe angiologjisë, Cristina Tomasi, shpjegon se trupi ynë funksionon mbi bazën e ritmeve cirkadiane shumë të sakta, të cilat sinkronizohen kryesisht nga drita natyrore.

Me ndryshimin e orës, organizmi detyrohet të përshtatet papritur me një orar të ri, duke e gjetur veten “të zhvendosur” nga ora biologjike.

Ky proces mund të ndikojë jo vetëm në gjumë, por edhe në sistemin kardiovaskular dhe atë metabolik, duke rritur përkohësisht edhe nivelin e hormoneve të stresit.

Megjithatë, specialistët sugjerojnë disa masa të thjeshta për ta bërë këtë tranzicion më të lehtë.

Përshtatja graduale e orarit të gjumit disa ditë përpara, ekspozimi ndaj dritës natyrore në mëngjes dhe shmangia e stimuluesve në orët e vona të ditës janë disa nga mënyrat më efektive.

Po ashtu, kufizimi i përdorimit të ekraneve në mbrëmje dhe mbajtja e një rutine të rregullt ndihmojnë trupin të rikthejë më shpejt ekuilibrin e tij natyror.