Ja emrat e gjyqtarëve të akuzuar nga EULEX-i

Në krye të një grupi gjyqtarësh që akuzohen se kanë nxjerrë vendime të paligjshme gjyqësore, duke bartur hektarë toke nga prona shoqërore në atë private, besohet se qëndron ish-kryetari i Gjykatës Komunale të Prishtinës, Nuhi Uka, kundër të cilit është ngritur aktakuzë për shpërdorim të pozitës zyrtare dhe nxjerrje të vendimeve të paligjshme gjyqësore.

Në aktakuzën e ngritur të martën nga një prokuror special i EULEX-it janë edhe ish-vartësit e Ukës, gjyqtarët e Gjykatës Komunale, Olga Janiçijeviq, Sanije Muqolli, Shemsije Sheholli dhe Jehomir Milaliq. Aktakuzë është ngritur edhe kundër ish-gjyqtarëve të Gjykatës së Qarkut të Prishtinës; Ekrem Agushi, Ferid Bislimi dhe Rrahman Retkoceri, të cilët akuzohen se si gjyqtarë të shkallës së dytë kanë vërtetuar aktgjykimet e paligjshme të shkallës së parëm, shkruan koha.

Prokuroria ka akuzuar edhe juristen e ish-ndërmarrjes shoqërore në Fushë-Kosovës, KBI “Kosova Export”, Hasnije Balidemaj, si dhe kundër avokatit Gazmend Gashi nga Prishtina. Ai është dhëndëri i Nuhi Ukës.

EULEX-i në një njoftim ka thënë se prokurori e ka akuzuar ish-kryetarin e Gjykatës Komunale për veprat penale shpërdorim të pozitës zyrtare dhe të autoritetit dhe për ndihmë në nxjerrjen e vendimeve gjyqësore të kundërligjshme.