Isufi: Qeveria Haradinaj do t’i realizojë kërkesat e veteranëve të UÇK-së

Aleanca për Ardhmërinë e Kosovës është duke i përcjellë me shqetësim kërkesat e veteranëve të luftës të Ushtrisë Çlirimtare të Kosovës (UÇK) dhe pozitën e tyre të vështirë, e cila është rënduar edhe më shumë nga injorimi që iu është bërë dhe po vazhdon t’iu bëhet veteranëve nga qeveria aktuale, tha Ahmet Isufi, nënkryetar i AAK-së, në një konferencë për media.

Isufi tha se “e kemi thirrur këtë konferencë me një porosi të vetme, se Aleanca për Ardhmërinë e Kosovës zotohet se, ashtu siç kishte vepruar në qeverisjen e z. Ramush Haradinaj, edhe përkundër pengesave të administratës së UNMIK-ut, kishim themeluar Departamentin e Vlerave të Luftës, duke nxjerrë ligjin për Familjet e Dëshmorëve dhe Invalidëve të luftës së UÇK-së”.

Sa i përket Ligjit aktual, i aprovuar në leximin e parë, Isufi tha se ky ligj nuk iu përgjigjet nevojave dhe kërkesave të veteranëve të UÇK-së dhe se arsyetimet e Qeverisë se nuk mund të mbulojë koston e ligjit me fondet aktuale, tregojnë pazotësinë e kësaj qeverie për të trajtuar një çështje shumë të ndjeshme dhe shumë strategjike për vendin.

“Për AAK-në është e papranueshme neglizhenca dhe papërgjegjësia e skajshme ndaj kësaj kategorie të shoqërisë sonë, që ka dhënë shumë për lirinë dhe ardhmërinë e Republikës së Kosovës. Është e pajustifikueshme që në rrethanat kur kemi shtetin e pavarur dhe institucionet pa UNMIK, qeveria dështon në realizimin e një të drejte themelore për luftëtarët e lirisë”, tha Isufi.

Sipas Isufit, kërkesat e veteranëve të luftës së UÇK-së, ashtu si dhe shumë nevoja të tjera që nuk janë marrë asnjëherë në konsideratë, do të bëhen realitet. “Për këtë është garancë qeveria e ardhshme, ajo që do të udhëhiqet nga z. Ramush Haradinaj”, tha Isufi. /Telegrafi/