Ismet Rashiti me dhimbje për ndarjen nga jeta të bashkëveprimtarit Mehmet Rashiti: “E gjallë do të mbetet vepra jote atdhetare”

Gjilan – Ismet Rashiti ka bërë të ditur lajmin e hidhur për ndarjen nga jeta të shokut dhe bashkëveprimtarit të tij, Mehmet Rashiti, nga fshati Livoç i Gjilanit. Sipas njoftimit të tij, Mehmet Rashiti ka ndërruar jetë në orët e para të mëngjesit në një spital në Gjenevë.

Në një postim të ndjerë, Ismet Rashiti ka kujtuar bashkëveprimtarin e tij, me të cilin, siç shkruan, ishte i pandarë në jetë dhe në veprimtarinë atdhetare.

Sipas Rashitit, Mehmet Rashiti ka qenë anëtar i Lëvizjes Popullore të Kosovës, anëtar i celulës së Degës së OMLK-së në Zvicër, anëtar i Komitetit Drejtues të LPRK-së për Zvicrën frankofone, anëtar i redaksisë së gazetës “Zëri i Kosovës”, si dhe anëtar i Këshillit të Përgjithshëm të LPRK-së.

“Me Mehmetin kemi qenë të pandarë në jetë dhe në veprimtarinë atdhetare”, ka shkruar Ismet Rashiti, duke shprehur dhimbjen për humbjen e mikut dhe bashkëveprimtarit të tij.

Në mesazhin e tij të lamtumirës, Rashiti kujton edhe miqësinë e gjatë me Mehmetin dhe mbështetjen që ai i kishte dhënë në momente të ndryshme të jetës.

“Sot në mëngjes paske shkuar, shoku im, pa më treguar. Ike, duke më lënë të pikëlluar e me lot për faqe, por e gjallë do të mbetet vepra jote e madhe atdhetare”, ka shkruar ai.

Ai ka kujtuar gjithashtu momentet e përbashkëta dhe praninë e Mehmet Rashitit në ditët e gëzimit dhe të vështirësive.

“Të paharruara do të jenë kujtimet e shumta, shoku im Mehmet, që më je gjendur pranë në gëzime dhe hidhërime, atëherë kur kisha më së shumti nevojë!”, thuhet në postimin e tij.

Në fund, Ismet Rashiti u ka shprehur ngushëllime familjarëve të të ndjerit në Livoç dhe në Zvicër, duke e përmbyllur mesazhin me fjalët:

“I përjetshëm qoftë kujtimi për ty! Lavdi!”./rajonipress/