Të gjithë kandidatët për kryeministër nga të gjitha partitë politike janë shprehur të gatshëm ta udhëheqin dialogun Kosovë – Serbi në rast se vijnë në krye të Qeverisë pas zgjedhjeve të 6 tetorit. Ky proces konsiderohet të jetë ndër çështjet më të rëndësishme me të cilat do të merret qeveria e ardhshme. Por, ndryshe nga qeverisja e kaluar, e cila ia kishte kaluar kompetencat e dialogut presidentit Hashim Thaçi e njëjta nuk pritet të ndodhë me qeverinë e re, së paku jo sipas asaj që partitë po deklarojnë në fushatë, shkruan Gazeta “Zëri”.
Politologu Dashnim Ismajli thekson se për qeverinë e re përmbyllja sa më e shpejtë e dialogut duhet të jetë prioritet, për shkak se ky proces e ka sfiduar integrimin e Kosovës.
Mirëpo një përmbyllje e dialogut sipas Ismajlit do të duhej të bëhej pa e përfshirë presidentin aktual në këtë proces.
“Mendoj se dialogun dhe qasjen ndaj tij e kanë sfiduar edhe pjesëmarrësit e politikës vendore, andaj ndryshimi i kësaj forme dhe qasja ndaj tij kërkon urgjencë. Së fundmi reformën e dialogut dhe një qasje të re ndaj tij unë e shoh duke evituar rolin e presidentit Thaçi si anëtari kryesor në këtë proces. Mendoj se shkaktari kryesor që dialogu ka rezultuar deri më tash i pasuksesshëm dhe joserioz ka qenë presidenti Thaçi e prepotenca e tij. Largimi i Thaçit nga dialogu është domosdoshmëri e kohës, pasi papërgjegjshmëria e tij e ka futur Kosovën në qorrsokak duke lidhur fatin e saj për interesin e tij personal”, ka thënë Ismajli për “Zërin”.
Ismajli thotë se dialogu duhet të udhëhiqet dhe të përmbyllet me konsensus të brendshëm politik. Sipas tij, një qeveri e ardhshme që do të formohej nga Lidhja Demokratike e Kosovës dhe Lëvizja Vetëvendosje do të mundë ta avanconte dhe ta përmbyllte këtë proces.
“Duke vështruar dialogun për së afërmi dhe në përgjithësi situatën politike kronologjikisht që nga 2010-a mendoj se dialogu duhet të udhëhiqet dhe të përmbyllet përmes një konsensusi të brendshëm politik. Megjithatë unë avancimin e proceseve dhe rrugëdaljen e shoh përmes një qeverie, e cila do të ndërtohej nga dy parti politike kosovare, LDK-së dhe LVV-së, ngase përmes kësaj formule qeverisëse do të minimizohej roli i presidentit Thaçi dhe rikthimi i tij vetëm në kompetencat që ia atribuon Kushtetuesja”, ka shtuar ai. /ZERI
