Ismajli: Është e pafalshme dhe skandaloze mënyra se si qeverisja qendrore dhe lokale kanë trajtuar projektin, për zgjerimin e hyrjes në qytetin e Gjilanit

Gjilan – Informatat që kemi pranuar sot nga deputetët Lutfi Haziri dhe Krenar Xhaferi nuk janë të mira për qytetin tonë, shkëputja e kontratës me BERZH për zgjerimin e hyrjes në qytetin e Gjilanit nga Prishtina! Është e pafalshme dhe skandaloze mënyra se si qeverisja qendrore dhe lokale kanë trajtuar projektin për zgjerimin e hyrjes në qytetin e Gjilanit, një projekt i financuar nga BERZH, duke e lënë këtë projekt me punë aty ku ka mbetë dhe duke mos u interesuar për përfundimin e tij ka shkruar Arbër Ismajli.

Postimi i plotë:

Ky ishte një projekt jetik për Gjilanin dhe Anamoravën. Sot, në vitin 2025, nga 3.9 milionë euro të planifikuara janë realizuar vetëm 929 mijë. Punët shtesë kapin vlerën mbi 500 mijë euro por asnjë përparim nuk ka.

Ky ishte një prej projekteve më të rëndësishme për infrastrukturën e qytetit, i planifikuar me fonde ndërkombëtare dhe me rëndësi strategjike për zhvillimin e rajonit. Sot, pas shumë vitesh pritje dhe vonesash të pajustifikueshme, jo vetëm që projekti nuk është realizuar, por erdhi informacioni që është shkëputur kontrata, duke rrezikuar të humbin fondet dhe besimi i institucioneve ndërkombëtare ndaj Kosovës.

Me afat 18-mujor për përfundim, nisur në 2020, kjo hyrje duhej të ishte përmbyllur në vitin 2022. Ky është sabotimi më i pafalshëm ndaj zhvillimit infrastrukturës moderne dhe të ardhmes së qytetit tonë!