Islami: Qosja ia ka shkruar fjalimet edhe Sinan Hasanit

Akademia e Shkencave dhe Arteve të Kosovës (ASHAK) shpalli zgjedhjet për pranimin e anëtarëve të rinj në këtë institucion të lartë shkencor, derisa anëtarët e saj nuk hezituan t’iu përgjigjen kritikave të akademikut Rexhep Qosja.

Drejtuesit e Akademisë saktësuan se zgjedhjet do të mbahen më 26 nëntor të këtij viti, ndërsa të drejtën për të kandiduar e kanë të gjithë ata që plotësojnë kushtet dhe kriteret e parapara me ligj dhe statut të ASHAK-ut.

Kryetari i ASHAK-ut, Hivzi Islami, tha se në këto zgjedhje do të zgjidhen anëtarët korrespodentë, të rregullt, të jashtëm dhe anëtarë nderi. “Numri i atyre që do të pranohen në këto zgjedhje, si anëtarë të rinj të ASHAK ut, nuk është i kufizuar. Viteve të fundit, mungesa e buxhetit i ka shtyrë ata që të pranojnë vetëm 10 anëtarë të rinj. Me rastin e zgjedhjeve dhe gjithë veprimtarisë së saj, Akademia kurrë nuk e ka shkelur ligjin, statusin, rregulloret dhe aktet tjera”, theksoi Islami.

Duke iu kundërpërgjigjur akuzave të akademikut Qosja, i cili vazhdimisht ka kritikuar ASHAK-un se është politizuar dhe se gjoja është bërë çerdhe e LDK-së, drejtuesit e ASHAK-ut të gjithë këto pretendime i hodhën poshtë në mënyrë kategorike.

“Kjo nuk është e vërtetë. Anëtarë të LDK-së janë vetëm dy veta – akademik Sabri Hamiti dhe anëtari korrespodent Isa Mustafa. Ky i fundit nuk ka qenë anëtar partie është pranuar. Propozimet kanë ardhur nga fakultetet, nga njësitë akademike. Ligji dhe statuti nuk e ndalon askënd që të konkurrojë”, ka sqaruar Islami.

KTV-ja raporton se gjatë mbledhjes së Akademisë është thënë se Qosja nuk shkon në Akademi prej vitesh, edhe pse merr rrogë nga ky institucion. Islami ka përsëritur se AASHK-ja nuk është politizuar dhe se qendron pikërisht e kundërta, pasi sipas tij, ka qenë Qosja ai që ia ka shkruar fjalimin edhe ish-komunistit Sinan Hasani, për t’u pranuar në Akademi.

Përkundër debatit të ashpër Akademia ka shpalosur edhe një projekt të madh – krijimi i një enciklopedie, e cila pritet të përfundojë brenda 10-15 vjetësh, kurse Fjalori enciklopedik pritet të jetë gati më 2015. /Telegrafi/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).