Ish kryetarja e KQZ-së kërkon nga Avokati i Popullit që shkarkimi i saj nga presidentja Osmani të dërgohet në Kushtetuese

Ish kryetarja e Komisionit Qendror të Zgjedhjeve, Valdete Daka ka dorëzuar sot një kërkesë te Avokati i Popullit për ta shqyrtuar shkarkimin e saj nga presidentja Vjosa Osmani.

Daka në një deklaratë për media tha se duhet të hiqet njëherë e përgjithmonë dilema se a ka pasur të drejtë presidentja Osmani ta shkarkojë ose jo.

“Sot dorëzova aneksen time te Avokati i Popullit dhe shpresoj se në kuadër të kompetencave që ka si institucion i pavarur do ta shfrytëzojë të drejtën e tij dhe në emër tim ta bëj kërkesën që të shqyrtohet kushtetutshmëria e vendimit të presidentes për shkarkim tim”, tha ajo, raporton Telegrafi.

Sipas saj, sidomos pas raportit të Bashkimi Evropian, mendon se edhe Avokati i popullit ka bazë të ligjore dhe arsye të mjaftueshme që kërkesën e saj ta dërgojë në Gjykatën Kushtetuese.

Ajo ka dhënë përgjigje edhe rreth asaj pse ka pritur deri tani ta dërgojë ankesën.

“Kam prit sepse kam konsideru se deputetët që e kanë këtë të drejtë kushtetuese do t’i mbledhin nënshkrimet dhe do ta kërkojnë vlerësimin e Kushtetutshmërisë së vendimit të zonjës Osmani, pra presidentes, mirëpo meqenëse deputetët si duket nuk kanë pasur shumë gatishmëri dhe ndërkohë meqë ishte fushatë zgjedhore nuk kam dashur që kërkesa ime të shfrytëzohet nga askush dhe të marr pronësinë mbi kërkesën time dhe po ashtu kam pritur të përfundoj raundi i parë i zgjedhjeve…”, tha ajo.

“Të hiqet njëherë e përgjithmonë dilema se a ka pasur të drejtë presidentja të më shkarkojë ose jo. Mos të mbetet kjo çështje e pa adresuar dhe të mos bëhet kjo precedent që mund të jetë e rrezikshme dhe të shfrytëzohet sa herë që dikujt nuk i pëlqen personaliteti i kryetarit të KQZ-së”, tha më tej Daka. /Telegrafi/