Isa Mustafa nuk do të jetë kandidat për Prishtinën

Prishtinë – Kryetari aktual i Prishtinës, Isa Mustafa, nuk do të jetë kandidat për kryetar të Prishtinës në zgjedhjet lokale, që pritet të mbahen kësaj vjeshte. Ai është kandidat i LDK-së për kryeministër, prandaj kjo parti pritet të garojë me një kandidat tjetër. Për LDK-në, Prishtina mbetet “një kështjellë e pamposhtur”, ndërsa synon këndelljen e saj dhe rikthimin e bastioneve të dikurshme.

Partia Demokratike e Kosovës, ndërkaq, po koncentron energjitë për të fituar sfidën e saj të vazhdueshme të zgjedhjeve – kryeqytetin. Por edhe “Vetëvendosje”, e cila aktualisht nuk udhëheq me ndonjë komunë, po synon të fitojë pushtetin, jo vetëm në një apo dy komuna, por në shumicën prej tyre.

Lutfi Haziri, nënkryetar i Lidhjes Demokratike të Kosovës (LDK), tha se zgjedhjet duhet të mbahen në vjeshtë dhe se nuk ka arsye për shtyrjen e tyre.

LDK-ja, sipas Hazirit, pretendon një kthim në të gjitha komunat. “Shikuar nga numri, nga përqindjet dhe nga mbështetja që ka nga zgjedhjet e fundit është parë qartë se LDK-ja e ka një mbështetje të fuqishme të qytetarëve”, shprehet Haziri, sipas të cilit në disa komuna LDK-ja është detyruar të qëndronte në opozitë për shkak të abuzimit me votat, duke përmendur rastin e Gjilanit, Prizrenit e Lipjanit. Ai propozon rishikimin e Ligjit për zgjedhjet, me qëllim garantimin e së drejtës së votës.

Edhe partia në pushtet, PDK-ja , e cila ka kryer në pjesën më të madhe reformën e saj të brendshme, tashmë ka filluar të mendojë rreth përgatitjeve për zgjedhjet lokale. Kryetari i porsazgjedhur i Degës së PDK-së në Prishtinë, Lirak Çelaj, thotë se i kanë nisur përgatitjet për zgjedhjet e ardhshme lokale. “Tani është një strukturë e re. Natyrisht ka edhe aktivistë që kanë qenë edhe më përpara, por është pasuruar edhe me kuadro të reja”, shprehet Çelaj. Sipas tij, PDK-ja e ka përmbyllur procesin e brendshëm zgjedhor pothuajse në të gjitha nëndegët e saj në Prishtinë dhe tani po punohet me përgatitjet për zgjedhjet lokale.

Çelaj thotë se po synon konsolidimin e strukturës ekzistuese dhe tërheqjen e kuadrove të reja profesionale.

Sa i përket kandidatit për Prishtinë, Çelaj tha se kjo do të diskutohet pas konsolidimit të Kryesisë së PDK-së në qendër. Ai shprehet se zgjedhja për kryetar dege nuk e bën atë me automatizëm edhe kandidat për kryetar komune.

Partia e cila e ka sprovuar veten në zgjedhjet e mëhershme, por që nuk ka pasur rastin të qeverisë, lëvizja “Vetëvendosje” gjithashtu synon që në zgjedhjet e ardhshme të fitojë disa komuna.

Dardan Molliqaj, nga lëvizja “Vetëvendosje” thotë se subjekti i tyre nuk është i koncentruar në një rajon, por në gjithë Kosovën. “Jemi subjekti më aktiv sa i përket opozitës jo vetëm në nivel vendi, por edhe atë lokal. Kemi organizuar me qindra tubime, dhjetëra aksione, tryeza dhe konferenca për media lidhur me problemet lokale, duke i theksuar keqpërdorimet me financat publike, nepotizmin e deri te mentaliteti i mbrapshtë qeverisës”, tha Molliqaj.

Edhe “Vetëvendosje” shprehet se është e interesuar për Prishtinën, por nuk jep ndonjë kandidat të mundshëm për këtë garë.(koha)