Investime në infrastrukturë: Zgjerohen rrugët dhe rritet siguria për qytetarët në Viti

Viti – Drejtoria për Shërbime Publike në Komunën e Vitisë ka vazhduar me realizimin e projekteve infrastrukturore, duke synuar përmirësimin e kushteve të qarkullimit dhe rritjen e sigurisë për qytetarët.

Sipas drejtorit Arton Musliu, në fshatin Vërban është bërë zgjerimi i rrugës në hyrje të fshatit, si dhe është realizuar shtrimi me zhavorr i anësoreve të rrugës “Rexhep Emerllahu”.

Ndërkohë, punimet kanë vijuar edhe në disa zona të tjera, ku është bërë shtrimi me zhavorr në dy segmente të rrugës “Hasan Prishtina” në Viti, si dhe në fshatrat Beguncë dhe Sllatinë e Poshtme. Po ashtu, është realizuar edhe rregullimi i parkingut në shkollën e Pozhoranit.

Këto ndërhyrje, sipas autoriteteve komunale, kanë për qëllim rritjen e sigurisë në lëvizjen e nxënësve, qytetarëve dhe automjeteve, duke krijuar kushte më të mira për qarkullim dhe jetesë.

Nga Drejtoria për Shërbime Publike bëhet e ditur se investimet në infrastrukturë do të vazhdojnë edhe në të ardhmen, me synimin për të përmirësuar cilësinë e jetës për të gjithë qytetarët e Komunës së Vitisë./rajonipress/