Institucionet komunale duhet të jenë tolerante për bizneset që krijojnë ambiente në pritjen e diasporës shqiptare!

Nga Gani Sadiku – Të gjithë ne e kemi ndarë kohën e mendjen që gëzimet, organizimet, ahengjet e ndryshme familjare, dasmat e organizimet e ndryshme t’i bëjmë në kohën e korrikut dhe gushtit, e njohur si koha e pushimeve verore, kohë kjo kur më të dashurit tonë marrin rrugën e gjatë dhe të mundimshme, në temperatura të larta duke pritur edhe nga 30 orë në kolona të gjata për të marrë pjesë në gëzimet tona e për tu çmallur me ne e ne me ata.

Por a janë ata të kënaqur me pritjen tonë dhe me trajtimin që ua bëjmë atyre? Sa për ta ilustruar sjelljen tonë, po e marrë si shembull qytetin ku unë jetoj.! Po thuaj se të gjitha institucionet në Kamenicë po mburren me barrierat që po ua bëjnë bizneseve, gjatë orarit të punës, duke i penguar “në format ligjore”, duke e shtuar intensitetin e kontrollave të tyre, duke i gjobitur me gjoba të majme për gabime të vogla, duke mos u dhënë vend dhe hapësirë publike për ushtrimin e veprimtarisë së tyre biznisore pos atyre që janë të lidhura me pushtetin komunal. Deri sa komuna e Gjilanit dhe shumica e komunave tjera në Kosovë janë tërësisht në dispozicion të bizneseve private dhe në pritjen e diasporës, ato janë edhe shumë miqësore me biznesin duke e zgjatur orarin e punës dhe duke ua mundësuar të bërit biznes në orët e natës për shkak të valës së shtuar të bashkatdhetarëve që e vizitojnë Kosovën.

Nga ana tjetër Kamenica tregohet mjaft armiqësore me biznesin privat. Shumica e bizneseve të kësaj komune edhe ashtu të lënë pasdore nga institucionet qendrore ankohen se qytetarët në orët e mbrëmjes ia mësyjnë komunave tjera e sidomos Gjilanit për të dëgjuar muzikë dhe për të pirë kafe, ndërkaq bizneset në këtë komunë gjobiten dhe u priten këmbët që në fillim të sezonës.

Komuna në vend se të organizojë programe dhe koncerte për nderë të diasporës, ka zgjedhur rrugën e gjobitjes edhe të atyre pak bizneseve që punojnë me gjatë, dhe që ndoshta eventualisht bëjnë ndonjë zhurmë të vogël./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).