Idrizi mohon akuzat, ndiqet penalisht për kanosje

Gjilan – Sylejman Idrizi punëtor teknik i pylltarisë në ekonominë e pyjeve në Gjilan akuzohet nga Prokuroria Themelore e Gjilanit, Departamenti për krime të përgjithshme për veprën penale “kanosje”, meqë sipas aktakuzës më 15 shkurt 2013 seriozisht e ka kanosur Shemsedin Qerimin shef i sektorit të pylltarisë. Por akuzat Idrizi i quan të montuara .

Prokuroria Themelore në Gjilan (Departamenti për krime të përgjithshme) ka ngritur aktakuzë kundër Sylejman Idrizit punëtor teknik i pylltarisë në ekonominë e pyjeve në Gjilan.

Sipas aktakuzës që e ka ngritur prokurori Shefik Mehmeti, Idrizi dyshohet për veprën penale “kanosje” meqë më 15 shkurt 2013 në objektin e drejtorisë dhe pylltarisë në Gjilan e ka kërcënuar seriozisht Shemsedin Qerimin shef i sektorit të pylltarisë.

Sipas aktakuzës Shemsedin Qerimi derisa e kishte ftuar të pandehurin në zyrën e tij që të konsultohet lidhur me organizimin e punës dhe sistemimin e të pandehurit në një vend tjetër të punës, i pandehuri Idrizi sistemimin e kishte refuzuar dhe në të njëjtën kohë e kanosë me fjalët “Se do ta likuidoj”. I pandehuri shkon në zyrën e drejtorit të bujqësisë Nazmi Rapuca ku i tregon për mosmarrëveshjen me Shemsedin Qerimin dhe e njofton Rapucën se nëse i ndërrohet vendi i punës “unë kam me e vra Shemsedinin”.

Tek i dëmtuari Shemsedin Qerimi sipas aktakuzës është krijuar një shqetësim, ankth, pasiguri dhe frikë për jetë.

Por aktakuzën dhe vet kallëzimin penal të policisë Sylejman Idrizi për rajonipress i ka quajtur shpifje dhe të montuara nga vet drejtoria e bujqësisë.”Të gjitha janë shpifje dhe të pavërteta sepse askënd se kam kërcënuar. Nuk dua lëmoshë e as mëshirë as nga Prokuroria e as nga Gjykata vetëm dua drejtësi sepse nuk jam keqpërdorues i punës” tha Idrizi.

Sipas Idrizit tërë këtë zhurmë që e ka ngritur drejtoria e bujqësisë po e bënë për interesa të veta për t`i sjellur njerëzit e vet në punësime të reja. Do të ankohem në të gjitha instancat gjyqësore dhe në të gjitha komisionet që mbrojnë të drejtat e punëtorëve dhe të drejtat e njeriut. Ky rast nuk do të heshtet, meqë po më bëhet një padrejtësi dhe kurth” thotë Idrizi./rajonipress/