I presin boshnjakët

I shumëkërkuari Naser Kelmendi vazhdon të jetë në Pejë, i patrazuar nga askush. Shteti i Bosnjës ende nuk ka arritur të lëshojë flet-arrest ndërkombëtar për të. Por, edhe nëse lëshohet flet-arresti, burime të Gazetës Express thonë se për t’u arrestuar i shumëkërkuari nevojitet një marrëveshje mes Ministrisë kosovare të Drejtësisë dhe asaj boshnjake.

Edhe pas pesë ditësh, situata mbetet e njëjtë.

Naser Kelmendi vazhdon të qëndrojë në Pejë, në shtëpinë e tij.

Të martën, Gazeta Express ka arritur t’i fotografojë pronat e Kelmendit dhe vëllezërve të tij, që ndodhen në lagjen periferike të Pejës, Fidanishte. Aty dyshohet se Kelmendi po i kalon ditët e tij prej se është larguar nga shteti i Bosnjës, i cili sipas burimeve të policisë së atjeshme, pritet që shumë shpejt të lëshojë një fletarrestim ndërkombëtar për të.

Deri atëherë, gjithçka do të mbetet siç është. Derisa ky shtet nuk e lëshon fletarrestimin, Kelmendi do të endet i lirë nëpër qytetin e tij. E, në momentin kur të ndodhë kjo, fatin e tij e ka në duar Ministria kosovare e Drejtësisë.

Është kjo Ministri, e cila pastaj do të vendosë se çfarë do të bëhet me Kelmendin, varësisht se çfarë marrëveshjeje arrin ajo me shtetin, i cili po e kërkon këtë njeri tash e sa kohë. Por deri tash, Kosova nuk ka asnjë marrëveshje me Bosnjën për ekstradimin e shtetasve kosovarë atje. Kjo pasi Bosnja deri tash nuk e ka njohur pavarësinë e Kosovës.

Është kjo arsyeja pse Policia e Kosovës, edhe pse është e informuar se Kelmendi ndodhet në Pejë, nuk ka ndërmarrë ndonjë aksion për arrestimin e tij. Sipas zyrtarëve të saj, arrestimi nuk mund të ndodhë pasi për Naserin nuk është lëshuar akoma ndonjë fletarrestim.

“Por edhe nëse lëshohet një fletarrestim i tillë, duhet kaluar disa procedura. Kjo çështje i takon Ministrisë së Drejtësisë. Policia merr vetëm urdhrat për arrestimin e tij”, thonë ata për Express.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).