I jepet lamtumira e fundit policit Jahi Maliqi

Kamenicë – Me nderime të larta shtetërore është përcjellë ceremonia e varrimit të policit Jahi Maliqi, i cili mbrëmë humbi jetën në një aksident tragjik derisa ishte në detyrë. Në mbledhjen komemorative të organizuar në Shtëpinë e Kulturës ”Isa Kastrati” në Kamenicë morën pjesë ministri i Punëve të Brendshme Bajram Rexhepi, Drejtori i Policisë së Kosovës Shpend Maxhuni, nënkryetari i Komunës Fatmir Matoshi, drejtoresha rajonale e Policisë Elmina Mahmuti dhe zyrtarë të tjerë të lartë të policisë dhe të komunës raporton rajonipress.

Kapiten Nazif Hajrizi komandant i Stacionit Policor në Kamenicë foli për jetën dhe veprën e Jahi Mlaiqit. “Sot kemi pikëllim dhe heshtje se gjatë kryerjes së detyrës zyrtare në një aksident tragjik rreth orës 20:35 në moshën 49 vjeçare humbëm kolegun e zellshëm të respektuar dhe të dashur Jahi Maliqin. Sot familja e të ndjerit eproret, kolegët e policisë së Kosovës dhe qytetaret e Kamenicës kanë arsye për të qenë të pikëlluar, sepse për herë të fundit po ndahemi nga polici dhe kolegu shumë i përkushtuar Jahi Maliqi i cili deri mbrëmë e kreu detyrën e policit ashtu si i ka hije pjesëtarit të policisë së Kosovës, prandaj jemi krenar që e patëm në mesin tonë që nga viti 2004” tha Kapiten Nazif Hajrizi.

Nënkryetari i Komunës së Kamenicës, Fatmir Matoshi duke folur në emër të institucioneve komunale e vlerësoi lart punën e oficerit të ndjerë Jahi Maliqi. “Në emër të Institucioneve Komunale të Kamenicës dhe në emër të Kryetarit të Komunës, Begzad Sinani i shprehim ngushëllimet më të sinqerta Familjes së oficerit të policor Jahi Maliqit për humbjen tragjike të kryefamiljarit të tyre. Poashtu i shprehim ngushëllime Ministrisë së Punëve të Brendshme dhe Ministrit Bajram Rexhepi, Stacionit Policor në Kamenicë dhe të gjithë kolegëve të Jahiut” ka thënë Matoshi.

Matoshi tha se vdekja e tij tragjike në kryerje të detyrës për të siguruar një ambient të qetë për të gjithë është frymëzim për punën tonë të mëtejme. “Ai nga qytetarët e Kamenicës do të kujtohet gjithmonë si një shërbyes i mirë i këtij vendi, si një kujdestar i sigurisë sonë, si një prind, fqinjë e bashkëqytetar i respektuar. Komuna Kamenicës e vlerëson lart punën e tij dhe të gjithë zyrtarëve policor dhe do të jetë pranë familjes së të ndjerit në këto qaste shumë të vështira për ta.” tha midis tjerash nënkryetari Matoshi

Zyrtari i policisë së Kosovës Toger Mustafë Dervodeli duke folur për jetën e Jahi Maliqit tha se do ta kujtojmë Jahin për kontributin e tij të gjithanshëm që ka dhënë në Policinë e Kosovës që nga viti 2004. “Jahiun do ta sjellim ndërmend si një zyrtar profesionist dhe këmbëngulës në kryerjen e detyrave të dhëna. Kemi qen me fat që kemi punuar me Jahiun dhe do ta kujtojmë gjithnjë si një personalitet që e donte shërbimin dhe dëshironte që ta bënte vendin më të sigurt për qytetarët. Vdekja e Jahiut është humbje jo vetëm për familjen, por edhe për Policinë e Kosovës ku ai si zyrtar dha kontributin e tij.” tha Dërvodeli

Në emër të familjes Maliqi të pranishmit i falënderoi Shpëtim Maliqi, nipi i Jahiut. Ndërsa flamurin e Policisë së Kosovës familjes Maliqi ia dorëzoi Kolonel Elmina Mahmuti, Drejtoreshë Rajonale e Policisë në Gjilan. I ndjeri u varros në prani të qindra qytetarëve e zyrtarëve policor në varrezat e fshatit Busavatë./rajonipress/