I jepet lamtumira e fundit doajenit të mjekësisë kosovare, Binak Kastratit

Prishtinë – Të enjtën me nderimet më të larta, është varrosur profesori dhe doajeni i Mjekësisë Binak Kastrati. Nëse diçka është zhvilluar pozitivisht në kohën e okupimit brenda Fakultetit të Mjekësisë atëherë vulën e suksesit e mbanë emri i Binak Kastratit. Një pedagog i zellshëm, një profesor i dashur, e, i respektuar, një njeri i guximshëm, patriot e atdhetar i madh, i patrembur ndaj pushtuesit. Binak Kastrati ishte ombrella e cilësisë së Mjekësisë Kosovare.

Në vendlindjen e tij të enjtën i është dhënë lamtumira e fundit profesorit e mjekut të njohur Binak Kastrati. Në këtë ceremoni janë thënë fjalët më të mira për profesor Binak Kastratin, ndërsa pjesëtarët e FSK-së me shumë të drejtë qëndronin pranë arkivolit sepse Binak Kastrati tërë kohen ka punuar për këtë kohë e këtë ditë.

Ishte prodekan për mësim në Fakultetin e Mjekësisë në kohën më të rëndë dhe më të vështirë, i cili bashkë me Zenel Kelmendin, Jusuf Dedushajn, Osman Sejfinë e profesor të tjerë e zhvilluan procesin mësimor nën tytat e policisë serbe.

Profesor Binak Kastrati ishte edhe anëtarë i shumë organizatave re shoqatave ndërkombëtare. Ishte i njohur edhe në fushën e Gjinekologjisë dhe ishte i dashur e, i pranueshëm nga të gjithë.

Binak Kastrati e donte popullin e tij, i donte studentët, i përkrahte kuadrot e reja, e donte ecjen dhe përparimin e Fakultetit të Mjekësisë. Ishte një njeri human, ekspert, edukues, prind, dhe mbi të gjitha njeri i fjalës dhe i besës.

Binak Kastrati pas vdekjes ka lënë një punë kolosale që gjeneratat e reja e kanë për obligim ta bëjnë publike.

Naser Ramadani një bashkëpunëtor i profesor Binak Kastratit ka shkruar këto fjalë për profesorin.”U trondita kur mora lajmin i hidhur i ndarjes nga jeta e Prof. Dr. Binak Kastrati, Profesorit të Gjinekologjisë dhe Obstetrikës, themeluesit dhe Kryetarit të Shoqatës së Mjekëve tê Kosovës. Mjeku duarartë dhe pedagogu i shquar që mbolli jetë dhe dituri. Profesor Binaku shkoi në përjetësi me veprën humane gjigante! I qoftë i lehtë dheu i Shqipërisë” ka shkruar Ramadani./rajonipress/