Hysi u mposht nga Drita

/ 3 minuta lexim
Uji Dea

Gjilan-Ekipi i Hysit është mposhtur në Gjilan me rezultat 2:1 nga ekipi i Dritës, i cili pas një pauze fitoresh e gjeti një të tillë këtë të diele.

Shënues: Ruhon Foniqi 76’, Labinot Jetullahu 87’ – Mentor Zhdrella (nga penaltia) 90’

Mbizotërimi i vendasve në fushë ka zgjatur gjatë tërë ndeshjes, por gola në pjesën e parë nuk pati, edhe pse Drita lehtë ka mundur të shënojë.
Lonit Abazi, në minutën 17 kaloi gati tërë mbrojtjen e Hysit, por nuk ia arriti të shënojë e u kundërpërgjigj mysafiri Osmani, që gjuajti drejt në Latifin në minutën 19.

Në minutën 31, Foniqi nuk qe i saktë kur gjuajti me kokë, pasi ishte shërbyer nga Osmani e në minutën 39 Kastrati kaloi edhe portierin, por gjuajtja e tij shkoi jashtë. Pjesa e parë u mbyll me rastin e Hoxhës në minutën 42, që gjuajti nga largësia, top të cilin e priti Latifi.

Deri te goli i parë u desh të pritet deri në minutën 76, pasi që Alimi depërtoi mirë në brendi e gjeti Foniqin e ky gjuajti me efe dhe mposhti Ademin e Hysit.
Drita që u lirua nga presioni i rezultatit ia doli të shënojë edhe njëherë tre minuta para se të kryhet ndeshja, pasi që Jetullahu u përvodh dhe nga largësia 24 metra qëlloi golin, mu pranë shtyllës.

Mysafirët u ankuan se gjilanasit nuk e ndalën lojën dhe nuk qenë fer, pasi pak para se të shënohej goli dy lojtarë ishin lënduar.
Në minutën e katërt shtesë, mysafirët fituan një penalti, që për vendasit qe jo me vend. Portieri Latifi ndërhyri në një top e aty u rrëzua Hoxha, kurse gjyqtari Qorraj me të parën tregoi në pikën e bardhë.

Realizator i pagabueshëm ishte Mentor Zhdrella, që zbuti rezultatin në 2:1.

Mobi Casa

Thanë pas ndeshjes:

Afrim Tovërlani (Hysi): “Ekipi im pati paraqitje të dobët. Drita e deshi më shumë fitoren dhe një gjë të tillë e arriti”.

Bekim Isufi (Drita): “Fitorja e ekipit tonë ishte e merituar. Bëmë një lojë të mirë e fitorja ishte e vështirë, por me lezet”.
Drita – Hysi 2:1 (0:0)

Stadiumi i qytetit në Gjilan. Shikues nuk pati. Gjyqtarë: Zenel Qorraj, Safet Berisha, Nazmi Raci. Shënues: Ruhon Foniqi 76’, Labinot Jetullahu 87’ – Mentor Zhdrella (nga penaltia) 90’. Kartoni i verdhë: Gërbeshi, Kastrati.

Drita: Latifi, Hashani, Gërbeshi, Foniqi, Sejdiu (Alimi), Ve. Sermaxhaj (Vi. Sermaxhaj), Kastrati, Abazi (Aliu), P. Osmani, Jetullahu, F. Osmani.

Hysi: Ademi, Idrizi, Sogojeva, Hasani (Breznica), Jashanica, Haliti, P. Osmani (Berisha), Emini, Hoxha, Zhdrella, L. Osmani./rajonipress/