Hyseni: Votat u vodhën në Konventën e PDK-së

Njëri ndër themeluesit e Partisë Demokratike të Kosovës, Hydajet Hyseni, ka akuzuar lidershipin e partisë së tij, se ka organizuar Konventën e VI-të duke shkelur statutin, vetëm për të fuqizuar vetveten.

Ai ka rrëfyer për emisionin Rubikon të KTV-së se shkeljet kanë nisur nga emri i zgjedhjeve që janë mbajtur, pasi statuti nuk njeh konventë, por vetëm kongres.

Ai ka përmendur edhe vjedhjet e votave që u bënë brenda PDK-së në zgjedhjet e fundit që, sipas tij, eliminuan njerëzit e dëshmuar të partisë. Megjithatë, Hyseni, thotë se do të vazhdojë të jetë pjesë e PDK-së, por se do të vëzhgojë dhe do të presë reflektimin e brendshëm partiak.

Hyseni, i cili thotë se përvojën e njëjtë e ka pasur edhe sa ishte pjesë e strukturave të LDK-së, ka potencuar se të gjitha partitë në vend po ngulfaten dhe nuk kanë funksionim demokratik. Por, sipas tij, PDK-ja duhet të reflektojë, sepse mund ta presë ajo që e ka gjetur edhe LDK-në.

“Një parti që udhëheq apo mëton ta drejtojë shtetin duhet të jetë shembull së pari në parti, ngase nëse dikush shkel normat në parti do t’i shkelë edhe normat e shtetit”, ka thënë ai.

Sa i përket kryesisë së re të PDK-së, Hyseni, ka thënë se janë ekip i mirë në përbërje të të cilit ka njerëz të respektuar, por, sipas tij, ata nuk mund të funksionojnë si grup. /Telegrafi/