Hyseni ka pritur në takim ministren Haxhiu, e njoftoi për veprimet që ka ndërmarrë Komuna kundër dhunës në familje

Gjilan – Kryetari i Komunës së Gjilanit, Alban Hyseni me bashkëpunëtorët, ka pritur në takim pune ministren e Drejtësisë, Albulena Haxhiu.

Hyseni, pasi e falënderoi ministren Haxhiu për vizitën, theksoi se në takim janë diskutuar një varg çështjes, me theks te veçantë për dhunën në familje.

“Çështje kryesore e diskutimit ishte dhuna në familje, e kemi njoftuar ministren për veprimet që ka ndërmarrë Komuna, për përkrahjen që e jep për të gjitha ato gra, nëna e vajza, të cilat ballafaqohen me dhunën në familje. Kemi marrë, po ashtu, disa rekomandime për veprime të reja që duhet t’i ndërmarrim”, ka thënë Hyseni.

Ministrja e Drejtësisë, Albulena Haxhiu, e ka falënderuar kryetarin Alban Hyseni për pritjen, të cilin e ka përgëzuar për punën dhe angazhimin për interes të qytetarëve.

Ajo theksoi se janë dakorduar edhe për aspektet se “si do të mbështeten strehimoret nga Komuna e Gjilanit, se si do të krijohet një fond i veçantë përmes Ligjit kundër dhunës në familje, sikurse edhe për Qendrën për Punë Sociale, mekanizmat si policia, prokuroria dhe gjykatat, të cilat duhet t’i kryejnë detyrat në raport me rastet e dhunës në familje”.

“Në këtë takim diskutuam aspekte të ndryshme, sidomos brengat që kanë qytetarët të cilat i shfaqin në takimet që kryetari dhe stafi i tij zhvillojnë me ta, e që lidhet edhe me sistemin e drejtësisë. Adresuam një prej problemeve të mëdha që e ka vendi ynë e që lidhet drejtpërdrejtë me dhunën në familje, dhunën ndaj grave dhe dhunën në baza gjinore. Më vjen mirë për të gjitha veprimet që i ka ndërmarrë kryetari i Komunës gjatës kësaj periudhe të shkurtër. Janë hapa të duhur dhe është një shenjë pozitive që Komuna e Gjilanit do të jetë ndër komunat që do të funksionojë më së miri”, ka thënë ministrja Haxhiu.

Më pas, kryetari Hyseni dhe ministrja Haxhiu kanë vizituar disa nga institucionet dhe mekanizmat që trajtojnë dhunën në familje, përkatësisht strehimoren e grave “Liria”, Qendrën për Punë Sociale dhe Policinë e Kosovës. /rajonipress/