“Humbja e shansit historik”, vjen paralajmërimi i rëndë për LDK-në dhe Vetëvendosjen

Lidhja Demokratike e Kosovës dhe Lëvizja Vetëvendosje dështuan në arritjen e një koalicioni parazgjedhor. Tani po paralajmërohet një koalicion i ri pas zgjedhor, por jo mes LDK dhe VV-së, por…

Shumica e analistëve politikë të cilët kanë besuar fuqishëm në arritjen e mundshme të koalicionit parazgjedhor në mes të LDK-së dhe VV-së, dështimin e këtij koalicioni po e shohin si thyerje të madhe të shpresës së vetme të qytetarëve për ndryshime pozitive pas 20 vjet të kapjes së shtetit nga krimi dhe korrupsioni. Këtë mendim e ndanë edhe analisti politik, Florim Zeqa.

Sipas Zeqës, kalimi i afatit ligjor për koalicione parazgjedhore, shënon fundin e shpresës për ndryshime pozitive në këto zgjedhje.

“Koalicionet e partive minore që aplikuan në KQZ në orët e fundit dhe mbetja në garë veç e veç e treshes së partive politike LDK, Vetëvendosje dhe PDK do të jenë të pamjaftueshme që të joshin qytetarin e zhgënjyer nga keq qeverisja e deritanishme e formacioneve politike që sunduan me vendin në këto 20 vjetët e fundit. Mos arritja e koalicionit të shumëpritur nga qytetarët e vendit LDK-LVV, e bën të pamundur ndryshimin e kursit qeverisës në vend”, tha Zeqa për “Kosova Sot Online”.

Ai po ashtu thotë se ashtu sikur që kishte parashikuar ditë më parë, nga beteja e nxehtë politike mes LDK-së dhe LVV-së, fituese do të dal PDK-ja me copëzat e saj të ndara në kinse koalicione parazgjedhore.

“Sikurse në të kaluarën, edhe tani, “mollë sherri” për mos dakordim u bë posti i kryeministrit, gjë e cila e dëshmon papjekurinë politike dhe mungesën e vullnetit për ndryshim të partive që rropën e ç’rropën shtetin dhe qytetarët për 20 vjet rresht. Thirrja në emër të elektoratit e subjekteve (LDK-LVV) që e patën në dorë ndryshimin e madh, është hipokrizia dhe mashtrim”, tha analisti Zeqa për “Kosova Sot Online”.

Ai shton se prapa kësaj hipokrizie qëndron egoja e pakufishme për të rrëmbyer sa më shumë nga “torta” e pushtetit, e jo interesi i qytetarëve.

“Edhe pas zgjedhjeve të parakohshme, do të vazhdojë keq-qeverisja, korrupsioni dhe krimi i organizuar, sikurse që do të vazhdojë sundimi i rendit dhe ligjit nga bandat partiake. Zgjedhjet e parakohshme do ta “prodhojnë” aleatin e ri (të vjetër) që do të mbështet marrëveshjen finale (fatale për Kosovën), ashtu siç e ka mbështet paraprakisht marrëveshjen për Decentralizimin (etnik), “Zajednicën”, për Gjykatën Speciale, për Demarkacionin me Malin e Zi e një varg marrëveshjesh tjera të dëmshme për Kosovën. Si çdo herë, edhe kësaj radhe, “ujqit e vjetër” koalicionin pas zgjedhor do ta arsyetojnë në emër të kinse interesit të shtetit, normalizimit të marrëdhënieve me Serbinë dhe ruajtjes së miqësisë me partnerët ndërkombëtarë. Si do që të jetë dhe çfarëdo që të ndodhë pas zgjedhjeve, mos arritja e koalicionit parazgjedhor LDK-LVV, mbetët rast i humbur dhe i pa përsëritshëm historik për largimin e uzurpatorëve nga pushteti dhe jo vetëm”, përfundoi Zeqa për “Kosova Sot Online”.