Hoxhaj: Zgjedhjet në veri, rikonfirmim i sovranitetit

Ministri i Punëve të Jashtme i Kosovës, Enver Hoxhaj, në një intervistë të publikuar në “Berliner Morgenpost” ka theksuar se zgjedhjet në tërë territorin e Kosovës, janë një përparim shumë i madh.

Ai ka thënë se mbajtja e zgjedhjeve në veri të Kosovës është dëshmi e forcimit të sovranitetit të Kosovës.

“Ato janë historike, sepse serbët e veriut për herë të parë kanë mundësinë të integrohen në institucionet kosovare. Zgjedhjet janë pjesë e marrëveshjes së normalizimit ndërmjet Serbisë dhe Kosovës të ndërmjetësuar nga Brukseli”, ka shtuar ai.

Hoxhaj edhe njëherë ka ripërsëritur se Serbia nuk e ka implementuar marrëveshjen në të gjitha pikat, prej fjalëve në vepra.

“Serbia bllokon Kosovën të jetë pjesë e organizatave rajonale. Më e theksuar është që Serbia pengon njohjen tonë ndërkombëtare nëpërmjet vendeve tjera. Jemi në rrugë për të shkruar një kapitull të ri në historinë e rajonit. Por premtimet nuk mjaftojnë, duhet të pasojnë veprimet”, ka thënë Hoxhaj. /telegrafi/