Hoxhaj: Viti 2013 – vit i diplomacisë kosovare!

Ministri i Punëve të Jashtme, Enver Hoxhaj, në një intervistë për Radio Kosovën tha se viti që e lamë pas ka qenë vit i sukseseve të diplomacisë kosovare. Sipas tij, njohjet nga vendet me peshë të madhe kontinentale, sikurse Egjipti e Libia në Afrikë, El Salvadori në Amerikën Latine, apo Tajlanda në Azinë Juglindore, kanë bërë që pozicioni i Kosovës në botë të jetë shumëfish më i fuqishëm.

Shqiptarët e Luginës së Preshevës kërkojnë nga shteti i Kosovës, por edhe diplomacia kosovare, që të drejtat e tyre në shtetin serb të jenë pjesë e dialogut Kosovë-Serbi. Hoxhaj thotë se është i shqetësuar për pozitën diskriminuese të komunitetit shqiptar që jeton në Luginë të Preshevës.

“Kemi bërë përpjekje, qoftë përmes bashkëpunimit politik, qoftë edhe përmes mbështetjes konkrete, që t’i mbështesim kërkesat e tyre, por në të njëjtën kohë, kemi kërkuar edhe nga faktori ndërkombëtar që të ndërmjetësojë për një dialog të brendshëm në mes të faktorëve politikë shqiptarë në Luginë të Preshevës, me qeverinë në Serbi, rreth avancimit të pozitës së tyre. Unë mendoj që ne duhet të jemi të përgjegjshëm në atë se çfarë themi dhe çfarë përfaqësojmë, por në të njëjtën kohë duhet të jemi edhe racionalë edhe humanë karshi kërkesave që kanë shqiptarët që jetojnë në Luginë të Preshevës”, ka thënë ai. /Telegrafi/